د جنوبي کوریا دفاع وزیر ان ګیو-بېک وايي چې د هیونمو-۵ پراخ تولید لا له وړاندې پیل شوی دی.
د جنوبي کوریا دفاع وزیر ان ګیو-بېک ویلي، جنوبي کوریا به د دې کال تر پایه خپل ځواکمن هیونمو-۵ بالستیک توغندی ځای پر ځای کړي، ترڅو د شمالي کوریا د مخ پر ودې اټومي ګواښ په وړاندې د "مخنیوي توازن" رامنځته کولو هڅې وکړي.
د جنوبي کوریا دفاع وزیر ان ګیو-بېک د پنجشنبې په ورځ له یونهاپ خبري اژانس سره په مرکه کې وویل چې د هیونمو-۵ پراخ تولید لا له وړاندې پیل شوی او د تولید د کچې لوړولو لپاره اقدامات روان دي.
هغه وویل: "دا چې جنوبي کوریا د اټومي وسلو د نه خپرولو تړون (NPT) غړی دی او اټومي وسلې نه شي لرلی، زه کلک باور لرم چې موږ باید د 'مخنیوي توازن' رامنځته کولو لپاره د پام وړ شمېر هیونمو-۵ ډوله خطرناک توغندي ولرو."
هیونمو-۵، چې د خپلې اندازې او ویجاړونکي ځواک له امله د "خطرناک توغندي" لقب هم ورکړل شوی، له ځمکې څخه ځمکې ته ویشتونکی بالستیک توغندی دی چې د اته ټنه دودیزې سرګلولې د لېږدولو او تر ځمکې لاندې پټنځایونو د ویجاړولو وړتیا لري.
د دغه توغندي څخه په لومړي ځل تېر کال د وسله والو ځواکونو د ورځې په مراسمو کې پرده پورته شوه.
د جنوبي کوریا دفاع وزیر ان ګیو-بېک دا وروستۍ څرګندونې وروسته له هغه وشوې، چې شمالي کوریا تېره اونۍ په یوه پوځي رسم ګذشت کې د لومړي ځل لپاره خپل نوی هواسونګ-۲۰ بین البراعظمي بالستیک توغندی (ICBM) نندارې ته وړاندې کړ.
هغه ادعا وکړه چې شمالي کوریا ممکن سږ کال دغه نوی بین البراعظمي توغندی وازمایي، او د توغندیو د توغولو یوې ساحې ته نږدې د ځینو کشف شویو خوځښتونو یادونه یې وکړه.
