امریکا او اروپايي ټولنې د 'سختو خبرو اترو' وروسته سوداګریز تړون لاسلیک کړ
ټرمپ وايي، 'زه فکر کوم چې دا ډېره ښه ده چې موږ نن د لوبو کولو پر ځای یوه موافقه وکړه.'
متحده ایالات او اروپايي ټولنې د سوداګرۍ یوه موافقه ترلاسه کړه چې د څو میاشتو نامعلوم وضعیت یې پای ته ورساوه، د امریکا ولسمشر ډونالډ ټرمپ د یکشنبې په ورځ وروسته له هغې اعلان وکړ چې د اروپايي کمېسیون له مشرې اورسولا وان ډیر لاین سره یې په سکاټلنډ کې وکتل.
ټرمپ د یکشنبې په ورځ د سکاټلینډ په ټرنبیري کې د خپل ګالف ریزورټ کې د خبرو اترو وروسته خبریالانو ته وویل: "زه فکر کوم چې دا ډیره ښه ده چې موږ نن د لوبو کولو پرځای یوه موافقه وکړه."
د امریکا ولسمشر وویل چې دی فکر کوي دا موافقه به دواړو خواوو لپاره "عالي" وي، چې د اروپايي ټولنې پر توکو د امریکا تعرفه ۱۵ سلنه ټاکي.
ټرمپ زیاته کړه: "دا به موږ یو بل ته نږدې کړي... دا یو ډول شراکت دی."
تر دې مخکې، واشنګټن د ۳۰ سلنه تعرفې د لګولو ګواښ کړی و.
د اروپايي کمېسیون مشرې هم دا موافقه وستایله او ویې ویل چې دا "یوه ستره موافقه" ده.
هغې زیاته کړه: "موږ یوه موافقه لرو؛ موږ د نړۍ د دوو لویو اقتصادونو ترمنځ د سوداګرۍ یو تړون لرو، او دا یوه مهمه معامله ده،" چې د "سختو خبرو اترو" پایله ده.
دغه تړون همداراز د اروپايي ټولنې له لوري د میلیاردونو ډالرو پانګونې او د انرژۍ پېرودلو ژمنې هم رانغاړي.
