بریتانیا به د ټرمپ له لوري ملاتړ شوې د ناټو هغه پروګرام ته ۲۰۰ میلیونه ډالر ورکړي چې د کیف لپاره د امریکايي وسلو د پېرلو په موخه جوړ شوی، او همدارنګه به اوکراین ته د بریتانیا جوړ ۱۰۰۰ توغندي هم ولېږي چې ارزښت یې له ۵۰۰ میلیونو ډالرو څخه زیات دی.
بریتانیا ژمنه کړې چې اوکراین ته به د هوايي دفاع په برخه کې سلګونه میلیونه ډالر ورکړي، ترڅو د روسیې د بریدونو پر وړاندې د دغه هېواد د برېښنا او تودوخې سیسټمونه خوندي وساتي.
د بریتانیا د دفاع وزارت د پنجشنبې په ورځ وویل چې شاوخوا ۲۰۰ میلیونه ډالر به د ناټو هغه پروګرام ته ځانګړي شي چې د امریکا د ولسمشر ډونالډ ټرمپ له خوا ملاتړ کېږي او د کیف لپاره د امریکايي وسلو د پېرلو په موخه جوړ شوی دی.
لندن به همدارنګه اوکراین ته د بریتانیا جوړ ۱۰۰۰ سپک توغندي ولېږي چې ارزښت یې له ۵۰۰ میلیون ډالر څخه زیات دی.
د بریتانیا د دفاع وزیر جان هیلي وویل چې د اوکراین متحدین «تر بل هر وخت زیات د اوکراین ملاتړ ته ژمن دي»، په داسې حال کې چې د روسیې جګړه خپل پنځم کال ته نږدې کېږي.
دا اعلان هغه مهال وشو چې د ناټو د دفاع وزیران په بروکسل کې راټول شوي وو، ترڅو له اوکراین سره د ملاتړ د زیاتولو په اړه بحث وکړي.
د جنګ ځپلي هیواد د انرژۍ پر شبکې د روسیې سختو بمباریو د یخ ژمي په شرایطو کې د هېواد په پراخو سیمو کې د تودوخې او برېښنا پرې کیدل شامل دي.
د جرمني د دفاع وزیر بوریس پیستوریوس وویل: «اړینه ده چې د ځان دفاع په برخه کې د اوکراین ملاتړ نور هم زیات شي.»
