په داسې حال کې چې د 'ریفارم یو کې' (Reform UK) ګوند په ټاکنو کې مخکې دی، د دغه ګوند مشر نایجل فراج دا بریا یو "تاریخي بدلون" بللی دی.
د برتانیا لومړي وزیر کییر سټارمر د جمعې په ورځ وویل، وروسته له هغه چې د انګلستان د محلي ټاکنو لومړنیو پایلو وښودله چې کارګر ګوند خپل نفوذ له لاسه ورکړی او 'ریفارم یو کې' ګوند مخکې شوی، دی به له خپلې دندې استعفا ونه کړي.
د بي بي سي نیوز (BBC News) په وینا، سټارمر خبریالانو ته وویل: "زه نه غواړم له خپلې دندې لاس واخلي او هېواد په ګډوډۍ کې واچوم." هغه د ۲۰۲۴ کال د جولای میاشتې په عمومي ټاکنو کې د کارګر ګوند بریا ته په اشارې سره وویل چې رای ورکوونکو هغه ته د پنځو کلونو لپاره واک ورکړی دی.
کله چې ترې وپوښتل شول چې ایا دی غواړي په راتلونکو عمومي ټاکنو کې هم ګډون وکړي، سټارمر ځواب ورکړ: "هو. زه د پنځه کلنې دورې لپاره ټاکل شوی یم او غواړم دا دوره بشپړه کړم." هغه ومنله چې دا پایلې د کارګر ګوند لپاره سختې دي او وویل چې ګوند باید پرې "غور" وکړي او ځواب ورکوونکی اوسي.
سره له دې چې د ډېرو رایو شمېرنه لا روانه ده، خو 'ریفارم یو کې' ګوند تر اوسه ۳۹۸ څوکۍ ګټلې او مخکې دی.
'تاریخي بدلون'
محافظه کار ګوند ۲۵۶ څوکۍ او کارګر ګوند ۲۵۳ څوکۍ ترلاسه کړې چې نږدې سره مساوي دي، په داسې حال کې چې لیبرال ډیموکراټان په ۲۴۹ څوکیو سره په دریم نمبر دي.
د سکای نیوز د راپور له مخې، د 'ریفارم یو کې' ګوند مشر نایجل فراج د ټاکنو لومړنۍ پایلې "د برتانیا په سیاست کې یو ریښتینی تاریخي بدلون" وباله. هغه وویل: "موږ تل سیاست ته د کیڼ او ښي اړخ په نظر کتلي، خو 'ریفارم' ګوند وکولای شول په هغو سیمو کې وګټي چې پخوا به تل د محافظه کارانو په لاس کې وې."
په انګلستان کې دا مهال د ۱۳۶ سیمه ییزو شوراګانو د ۵۰۰۰ څوکیو لپاره ټاکنې روانې دي. همداراز په پنځو لندني سیمو او واټفورډ کې د ښاروالۍ ټاکنې هم ترسره کېږي. د ډېرو شوراګانو د رایو شمېرنه د جمعې په ورځ پیل شوې او وروستۍ پایلې به یې د شنبې په ورځ څرګندې شي.
په سکاټلنډ او ویلز کې هم خلکو په پارلماني ټاکنو کې رایې ورکړې دي. په سکاټلنډ کې د پارلمان د ټولو ۱۲۹ څوکیو لپاره ټاکنې ترسره شوې، چې پکې ۷۳ د حوزو غړي او ۵۶ سیمه ییز غړي شامل دي. په ویلز کې هم خلک خپل حکومت او د پارلمان غړي ټاکي، چې دا په ۱۹۹۹ کال کې ویلز ته د واکونو له لېږد وروسته په دغه پارلمان کې تر ټولو لوی بدلون بلل کېږي.
