دا برید د پنجشنبې په شپه د خیبر پښتونخوا ایالت په ټنک (Tank) سیمه کې شوی دی.
د پاکستان په شمال لوېدیځ کې پر یوې امنیتي پوستې په یو ترهګریز برید کې د ۱۲ پوځيانو، دوو پولیسو او د ځنګلونو د ادارې د یوه پخواني چارواکي په ګډون ۱۵ تنه وژل شوي دي.
د پاکستان د پوځ د عامه اړيکو دفتر د جمعې په ورځ په یوې اعلاميه کې ویلي چې دا برید د پنجشنبې په شپه د خیبر پښتونخوا ایالت په ټنک (Tank) سیمه کې شوی دی. بریدګرو امنیتي پوستې ته د ننوتلو په موخه، له چاودېدونکو توکو ډک یو موټر د پوستې له دیوال سره جنګولی دی.
په اعلامیه کې ادعا شوې چې بریدګر د "فتنه الخوارج" په نامه ډلې پورې تړلي وو، چې د پاکستان په وینا د هند تر ملاتړ لاندې فعالیت کوي (دا هغه اصطلاح ده چې اسلاماباد یې د پاکستاني طالبانو یا TTP لپاره کاروي). هند تر اوسه د دې تور په اړه څه نه دي ویلي، خو نوي ډيلي په تېر وخت کې دا ډول ادعاوې تل رد کړې دي.
د پاکستان پوځ دغه راز خبر ورکړی چې د نښتې پر مهال ۱۲ بریدګر هم وژل شوي دي. په اعلامیه کې زیاته شوې چې په سیمه کې د نورو احتمالي بریدګرو د له منځه وړلو او د سیمې د پاکولو په موخه چاڼیز عملیات لا هم دوام لري.
