اروپایي ټولنه پر داسې پلانونو کار کوي چې د کډوالو په اړه د بشري حقونو د ډلو او د ملګرو ملتونو د کډوالو ادارې له اندېښنو سره سره، دا کسان بېرته افغانستان ته واستوي.
د طالبانو د چارواکو دا سفر، چې د اروپایي کمیسیون او د څو غړو هیوادونو لخوا یې همغږي کیږي، وروسته له هغه ترسره کیږي چې اروپایي چارواکو په همدې تړاو د "اکتشافي" خبرو لپاره افغانستان ته دوه سفرونه وکړل.
یوې ډیپلوماتیکې سرچینې اژانس فرانس پرس ته ویلي: "موخه دا ده چې هغوی له اوړي مخکې راوبلل شي." سرچینې زیاته کړې چې د طالبانو دا پلاوی به یو "تخنیکي" ټیم وي.
په بحثونو کې یوې ښکېلې سرچینې ویلي: "اروپایي چارواکي د الوتنو، د کابل هوايي ډګر د ظرفیت او د بېرته ستنېدونکو کسانو د برخلیک په اړه معلومات راټولوي." که څه هم اروپایي کمیسیون تر اوسه طالبانو ته رسمي بلنه نه ده لېږلې.
د افغانانو د اخراج بهیر ګړندي کول د اروپایي ټولنې د هیوادونو ترمنځ په یوه عامه غوښتنه بدل شوي، ځکه چې د مهاجرت په اړه د خلکو منفي نظر په ۲۷ هیوادونو کې د ښي اړخو ګوندونو انتخاباتي بریاوو ته لاره هواره کړې ده. شاوخوا ۲۰ اروپایي هیوادونه دا څیړي چې څنګه افغانان، په ځانګړي ډول هغه کسان چې په جرمونو محکوم دي، بېرته خپل هیواد ته واستوي.
جرمني لا دمخه دا لړۍ پیل کړې او له ۲۰۲۴ کال راهیسې یې له ۱۰۰ څخه ډېر افغانان د قطر په منځګړیتوب په ځانګړو الوتنو کې ایستلي دي. اتریش هم ورته ګام پورته کړی دی.
که څه هم دا سفر په پیل کې د مارچ د میاشتې په پای کې پلان شوی و، خو سرچینې وايي چې اوس به په راتلونکو اونیو کې ترسره شي.
خو د اخراج دغه هڅو ګڼې اندېښنې راپارولې دي. د بشري حقونو ډلې وايي چې افغانستان د وچکالۍ او د بهرنیو مرستو د کمښت له امله د یوه بشري ناورین په منځ کې دی. سربیره پردې، اروپایي ټولنه په رسمي ډول د طالبانو حکومت نه پیژني، چا چې په ۲۰۲۱ کال کې واک ته له رسیدو وروسته سخت قوانین پلي کړي دي.
د ۲۰۱۳ او ۲۰۲۴ کلونو ترمنځ، افغانانو په اروپایي هیوادونو کې نږدې یو ملیون د پناه غوښتنې غوښتنلیکونه سپارلي و، چې تیر کال افغانان د پناه غوښتونکو تر ټولو لویه ډله وه.
