روسیې د شنبې په ورځ د امریکا له ادارې وغوښتل چې د اوکراین د جګړې په هر ډول هوکړه کې "میداني واقعیتونه" په پام کې ونیسي او ادعا یې وکړه چې وضعیت د کییف په زیان د بدلېدو په حال کې دی.
د روسیې د بهرنیو چارو وزارت مرستیال سرګي ریابکوف له "تاس" خبري اژانس سره په خبرو کې وویل: "اصلي پوښتنه دا ده چې د امریکا اداره تر کومه حاضره ده چې میداني واقعیتونو ته په کتو د اوسني کړکېچ د حل لپاره پر یوې حقیقي حل لارې پانګونه وکړي."
هغه دا څرګندونې د امریکا د ځانګړي استازي سټیو ویټکوف او د امریکا د ولسمشر ډونالډ ټرمپ د زوم جیرارډ کوشنر مسکو ته د احتمالي سفر په اړه د یوې پوښتنې په ځواب کې وکړې.
د جمعې په ورځ، ټرمپ وویل چې دغه استازي د روسیې او اوکراین ترمنځ د سولې د یوې هوکړې د ترلاسه کولو په موخه بهر ته په سفر دي.
ټرمپ وویل: "ما سټیو ویټکوف او جیرارډ کوشنر، چې دوه تکړه مذاکره کوونکي دي، استولي دي. هغوی عالي کار کړی دی او موږ هغوی د دې لپاره واستول ترڅو وګورو چې ایا څه کولی شو که نه. او ښايي ښه چانس وي چې موږ دا کار وکړو."
د سولې هڅې له ایران سره د واشنګټن د جګړې له امله له خنډ سره مخ شوي، په داسې حال کې چې مسکو او کییف لیرې واټن ویشتونکي بریدونه زیات کړي، چې ملکي تلفات یې هغې کچې ته رسولي چې د جګړې له پیل راهیسې نه وو لیدل شوي.
ویټکوف او کوشنر، چې په غزه او ایران کې د اوربند په خبرو اترو کې هم ښکېل وو، تر دې وړاندې د پخوانیو ډیپلوماټیکو هڅو په ترڅ کې څو ځله مسکو ته سفرونه کړي دي.
دا اقدام د دویمې نړیوالې جګړې راهیسې په اروپا کې د تر ټولو خونړۍ جګړې د ډیپلوماټیک بن بست ماتولو لپاره د واشنګټن تازه هڅه ده؛ دا جګړه په ۲۰۲۲ کال کې پر اوکراین د روسیې له پراخ برید سره پیل شوې ده.
