افغانستان له لنډ پرېکون وروسته مجازي نړۍ ته راستون شو

طالبان وايي، په ټول هېواد کې د انټرنېټ پرېکون لامل د نوري فایبر 'له کاره لوېدلی' لاین دی چې د بدلولو په حال کې دی

ځايي رسنیو راپور ورکړی چې په ټول هېواد کې له دوه ورځني پرېکون وروسته ټولې مخابراتي شبکې بېرته فعالې شوې دي.

طالبانو ته یوه نږدې کس، چې معمولاً د لنډمهالي حکومت تازه معلومات شریکوي، هم د امریکا په ټولنیزه شبکه X کې ویلي چې افغانستان بېرته انلاین شوی دی.

نېټ بلاکس (Netblocks) هم ویلي چې په افغانستان کې انټرنېټ په جزوي توګه بېرته فعال شوی دی.

د افغانستان لنډمهالي حکومت له دې وړاندې د انټرنېټ د بندیز راپورونه رد کړي وو او ټینګار یې کړی و چې په ټول هېواد کې دغه پرېکون د نوري فایبر د 'له کاره لوېدلي' لاین له امله دی چې د بدلولو په حال کې دی.

د طالبانو د حکومت ویاند، ذبیح الله مجاهد، ویلي وو چې په افغانستان کې د نوري فایبر 'زاړه' زیربنا 'په بشپړ ډول' له کاره لوېدلې او د بدلولو په حال کې ده.

مجاهد په X کې په یوه پوسټ کې ویلي وو: «دا خبره حقیقت نه لري چې ګواکې موږ په هېواد کې انټرنېټ بند کړی دی،» او دا ډول راپورونه یې یوازې "اوازې" بللې وې.

د دوشنبې په شپه ناوخته د پرېکون له پیل وروسته، د سه‌شنبې په ورځ هم په ټول افغانستان کې د انټرنېټ او موبایل شبکې بندې پاتې شوې وې.