د کاناډا لومړی وزیر مارک کارني: "دا اسلاموفوبیک تاوتریخوالی بوږنوونکی دی او په کاناډا کې ځای نه لري."
د کاناډا په 'وینیپیګ' ښار کې پر یوه جومات وسله وال برید شوی دی.
د دغه ښار د 'رحمة اسلامي مرکز' لخوا په خپره شوې خبرپاڼه کې ویل شوي چې دا پېښه تېره شپه رامنځته شوې ده. په خبرپاڼه کې راغلي چې په جومات کې د خلکو د شتون پر مهال، دوو کسانو له یوه موټر څخه پر جومات ډزې وکړې او بیا یې د یوې وسیلې په واسطه د ودانۍ هیندارې ماتې کړې او زیان یې ورساوه.
په برید کې چا ته مرګ ژوبله نه ده اوښتې او پولیس دا پېښه د یوه احتمالي "نفرت پاروونکي جرم" په توګه څېړي.
د کاناډا لومړي وزیر مارک کارني پر خپله اېکس (پخوانۍ ټویټر) پاڼه د دغه برید په اړه غبرګون ښودلی دی. کارني ویلي چې دې برید په ژوره توګه دردولی او زیاته کړې یې ده: "دا اسلاموفوبیک تاوتریخوالی بوږنوونکی دی او په کاناډا کې ځای نه لري. په دې شکر کوم چې چا ته زیان نه دی رسېدلی. زه له هغو امنیتي ادارو (کاري ځواکونو) څخه پوره ملاتړ کوم چې د مجرمینو عدالت ته د راکاږلو لپاره کار کوي."
