ایران د امریکا او اسرائيلو د جګړې له پیل راهیسې ۵۰۰ کسان د جاسوسۍ په تور نیولي دي

د ایران د پولیسو مشر د یکشنبې په ورځ وویل چې د امریکا او اسرائيلو د بریدونو له پیل راهیسې ایراني چارواکو ۵۰۰ کسان د جاسوسۍ په تور نیولي دي.

د نیمه رسمي تسنیم خبري اژانس په وینا، برید جنرال احمدرضا رادان وویل چې نیول شوي کسان د "دښمن او دښمن رسنیو لپاره د جاسوسۍ" په شک نیول شوي دي.

رادان وویل چې د نیول شویو کسانو څخه ۲۵۰ یې "په لندن کې میشته ایران انټرنیشنل ته استخباراتي معلومات چمتو کول، په شمول د هدفي ځایونو په اړه معلومات."

هغه زیاته کړه چې شکمن کسان له وسله ‌والو ډلو سره هم تړاو لري او هڅه یې کوله عامه نظم ګډوډ کړي، او هغوی یې «جاسوسان» وبلل چې معلومات یې «دښمن او دښمنو رسنیو ته» رسول.

د ایران حکومت په ۲۰۲۲ کال کې د ایران انټرنیشنل تلویزیون د «ترهګر سازمان» په توګه ونوماوه، او تور یې پرې ولګاوه چې په هېواد کې د حکومت ضد لاریونونو په اړه ګمراه کوونکي معلومات خپروي او لاریون کوونکي د تاوتریخوالي اعمالو ته هڅوي، او همدارنګه یې اعلان وکړ چې په ایران کې د دې رسنۍ د کارکوونکو شتمنۍ به ضبط کړي.

دا نیونې په داسې حال کې کیږي چې امریکا او اسرائيل د فبروري له ۲۸مې راهیسې پر ایران ګډ برید ته دوام ورکړی، چې شاوخوا ۱۳۰۰ کسان پکې ووژل شول، چې د هغه وخت ستر مشر علي خامنه ای هم پکې شامل وو.

ایران هم د غبرګون په توګه پر اسرائيلو، او همدارنګه پر اردن، عراق او د خلیج پر ځینو هېوادونو د بې ‌پیلوټه الوتکو او توغندیو بریدونه کړي، او وایي چې هدف یې د امریکا پوځي شتمنۍ دي، چې په پایله کې یې مرګ ژوبله او ځینې ملکي زیربناوو ته زیان اوښتی او نړیوال بازارونه او هوايي چلند اغیزمن شوی دی.