ټرمپ په نایجریا کې د داعش پر اهدافو د امریکا د بریدونو اعلان وکړ
د امریکا ولسمشر وايي چې پنټاګون په نایجریا کې د داعش پر اهدافو ګڼ شمېر دقیق بریدونه ترسره کړي دي.
د امریکا ولسمشر ډونالډ ټرمپ ویلي چې متحده ایالاتو د نایجیریا په شمال لوېدیځ کې د داعش پر اهدافو بریدونه کړي، او ادعا یې کړې چې دغه ډله عیسویان په نښه کوي.
ټرمپ د پنجشنبې په ورځ پر ټروت سوشیل ولیکل: «نن شپه، د ستر قومندان په توګه زما په لارښوونه، متحده ایالاتو د نایجیریا په شمال لوېدیځ کې د داعش ترهګرو پر ضد یو پیاوړی او مرګونی برید ترسره کړ، هغه ترهګر چې په ځانګړي ډول بې ګناه عیسویان په نښه کوي او په بې رحمۍ یې وژني.»
هغه زیاته کړه: «ما مخکې هم دغو ترهګرو ته خبرداری ورکړی و چې که د عیسویانو وژنه ونه دروي، نو سخت قیمت به پرې کړي، او نن شپه همداسې وشول.»
ټرمپ وویل چې پنټاګون ګڼ دقیق او بشپړ بریدونه ترسره کړل، «لکه څنګه چې یوازې متحده ایالات یې د ترسره کولو وړتیا لري.»
د نایجیریا د بهرنیو چارو وزارت د جمعې په ورځ تایید کړه چې د امریکا له خوا ترسره شوي دقیق هوايي بریدونه د هېواد په شمال لوېدیځ کې «ترهګریز اهداف» په نښه کړي دي، او زیاته یې کړه چې نایجیریا لا هم له واشنګټن سره د «منظم امنیتي همکارۍ» په چوکاټ کې بوخته ده.
د ځواک ښودنه
د امریکا د افریقا قومندانۍ (AFRICOM) په ایکس کې په یوه بیان کې وویل چې دغه برید د نایجیریا د چارواکو په غوښتنه ترسره شوی دی.
افریکام (AFRICOM) په خپل بیان کې وویل: «د نایجیریا د چارواکو په غوښتنه، AFRICOM په سوبوتو ایالت کې برید ترسره کړ چې په پایله کې یې د داعش څو ترهګر ووژل شول»، چې موخه یې د نایجیریا په شمال لوېدیځ کې د سوکوتو ایالت وه.
په بیان کې زیاته شوې: «د داعش پر ضد مرګوني بریدونه زموږ د پوځ ځواک او زموږ هغه ژمنتیا ښيي چې په کور دننه او بهر د امریکایانو پر وړاندې د ترهګریزو ګواښونو له منځه وړو ته یې لرو.»
د نایجیریا حکومت تر دې وړاندې ویلي وو چې وسله والې ډلې هم مسلمانان او هم عیسویان په نښه کوي. خو ټرمپ د اکتوبر په میاشت کې ادعا کړې وه چې عیسویان په دغه هېواد کې له «وجودي ګواښ» سره مخ دي.
د همدې اوونۍ په پیل کې، د رویټرز خبري اژانس راپور ورکړی و چې امریکا د نومبر له وروستیو راهیسې د نایجیریا پر پراخو سیمو د استخباراتي معلوماتو د راټولولو الوتنې ترسره کوي.
