افغانستان: غواړو د امریکا په ګډون له ټولو هېوادونو سره ښې اړیکې ولرو
د افغانستان حکومت اعلان وکړ چې غواړي د امریکا متحده ایالاتو په ګډون له ټولو هېوادونو سره پر اقتصادي او سیاسي برخو متمرکزې ښې اړیکې جوړې کړي.
د افغانستان د حکومت ویاند ذبیح الله مجاهد له ځايي رسنیو سره په خبرو کې په دې اړه څرګندونې وکړې.
مجاهد وویل: "موږ د امریکا په ګډون له ټولو هېوادونو سره د ښو اړیکو د جوړولو ملاتړ کوو. زموږ اړیکې باید پر دوو بنسټونو ولاړې وي: ډیپلوماسي او سوداګري. په دې برخه کې، موږ تل له امریکا سره اړیکه نیولې او هڅولي مو دي چې په دغو برخو کې له موږ سره همکاري وکړي."
مجاهد د بګرام هوايي اډې د بېرته نیولو په اړه د امریکا د ولسمشر ډونالډ ټرمپ څرګندونو ته په اشارې سره وویل، ټرمپ باید د دا ډول څرګندونو پر ځای په کابل کې د امریکا سفارت بېرته پرانیزي.
ذبیح الله مجاهد زیاته کړه: "د دې ډیپلوماتیکې لارې په بیا پرانیستل کېدو سره د افغانستان او امریکا ترمنځ مناسبې او مشروع اړیکې ټینګېدای شي. موږ د ښو اړیکو د جوړېدو ملاتړ کوو، وبه ګورو چې هغوی څه وايي."
د بګرام په اړه د ټرمپ پلان
ټرمپ د سپټمبر په ۱۸مه د برېتانیا له لومړي وزیر کیر سټارمر سره په ګډه خبري ناسته کې ویلي وو، چې غواړي د بګرام هوايي اډه بېرته ونیسي، کومه چې په ۲۰۰۱ کال کې پر افغانستان د امریکا په مشرۍ د ائتلافي ځواکونو تر یرغل وروسته په دغه هېواد کې د دوی تر ټولو لویه پوځي اډه وه.
ټرمپ داسې اشاره هم کړې وه چې ګواکې دوی د افغانستان له حکومت سره د دې پوځي اډې د بېرته ترلاسه کولو لپاره خبرې اترې کوي، کومه چې په ۲۰۲۱ کال کې د امریکايي ځواکونو د وتلو پر مهال پرېښودل شوې وه. هغه ویلي وو: "دا د نړۍ له سترو هوايي اډو څخه یوه ده. موږ دا اډه هغوی ته په وړیا توګه وسپارله. اوس هڅه کوو چې بېرته یې ونیسو. د دې اډې د غوښتلو یو لامل دا دی چې دا له هغه ځایه یو ساعت لرې ده، چېرته چې چین خپلې اټومي وسلې جوړوي."
د افغانستان د حکومت د بهرنیو چارو وزارت یوه چارواکي ذاکر جلالي د ټرمپ دغو څرګندونو ته په ځواب کې ویلي وو: "افغانستان او امریکا له یو بل سره تعامل ته اړتیا لري او کولی شي چې د متقابل درناوي او ګډو ګټو پر بنسټ اقتصادي او سیاسي اړیکې جوړې کړي، خو پرته له دې چې امریکا د افغانستان په کومه برخه کې پوځي شتون ولري."
وروسته ټرمپ د ټروت سوشل (Truth Social) په نوم پر خپلې ټولنیزې شبکې، چې مرکز یې په امریکا کې دی، په یوه بیان کې لیکلي وو: "که افغانستان د بګرام هوايي اډه بېرته امریکا ته ونه سپاري، نو بدې پایلې به ولري."
