شمالي کوریا پر ایران د اسرائیلو بریدونه وغندل او دا بریدونه يي بشریت پر وړاندې جنایت بللی دی.
شمالي کوریا پر ایران باندې د اسرائیلو پوځي بریدونه غندلي دي، او دا یې د انسانیت پر وړاندې یو "جنایت" بللی دی. همداشان شمالي کوریا خبرداری ورکړی چې دا کړنې د منځني ختیځ په بې ثباته کولو او په سیمه کې د پراخې جګړې د پیل خطر زیاتوي.
د شمالي کوریا دولتي خبري اژانس KCNA د پنجشنبې په ورځ د بهرنیو چارو وزارت د ویاند له قوله ویلي چې پیونګ یانګ د اسرائیلو لخوا د ایران پر ملکي، اټومي او انرژۍ ځایونو بریدونو په اړه "جدي اندیښنه" څرګنده کړې او دا یې په کلکه غندلي دي.
ویاند زیاته کړه چې د اسرائیلو په بریدونو کې د ملکي وګړو وژل "د انسانیت پر وړاندې یو نه بښونکی جنایت" دی، او اسرائیل یې د "دولت لخوا تمویل شوې ترهګرۍ" په ترسره کولو تورن کړ. شمالي کوریا ټینګار کړی دی چې دا کړنې په سیمه کې د یوې نوې پراخې جګړې خطر زیاتوي.
شمالي کوریا همدارنګه د امریکا او اروپایي هېوادونو څخه وغوښتل چې نور مداخله ونه کړي.
د بهرنیو چارو وزارت ویاند وویل: "اوسنی جدي وضعیت چې نړۍ مشاهده کوي په ښکاره توګه ثابتوي اسرائیل چې ، د امریکا او لویدیځ لخوا يي ملاتړ او پالنه کیږي، د منځني ختیځ د سولې لپاره د سرطان په څېر یو موجودیت دی او د نړیوالې سولې او امنیت د خرابولو اصلي عامل دی."
هغه زیاته کړه: "نړیواله ټولنه په کلکه د امریکا او لویدیځ ځواکونو څارنه کوي چې د جګړې اور ته لمن وهي، په داسې حال کې چې د ایران د مشروع حاکمیت حق او د ځان د دفاع پر حق سترګې پټوي. "
د 'فاجعوي پړاو' خبرداری
د شمالي کوریا دا څرګندونې په داسې حال کې ترسره کیږي چې د امریکا ولسمشر ډونالډ ټرمپ ویلي چې د ایران په وړاندې یې "صبر ختم شوی" دی.
شمالي کوریا واشنګټن ته خبرداری ورکړ چې له مداخلې ډډه وکړي، او ویې ویل چې د امریکا او د هغې د متحدینو کړنې "د منځني ختیځ وضعیت یوې نه کنټرولېدونکې فاجعوي مرحلې ته رسوي."
د ټرمپ څرګندونې وروسته له هغې مخې ته راغلې چې د ایران ستر مشر علي خامنه اي د هغه غوښتنې چې ایران دې "بې قید او شرطه تسلیم" شي رد کړې، او امریکا ته یې خبرداری ورکړ چې که مداخله وکړي نو "نه جبرانېدونکي زیانونه" به وګوري.
په همدې حال کې، د وال سټریټ ژورنال راپور ورکړی چې ټرمپ د سه شنبې په ورځ خپلو سلاکارانو ته ویلي چې د ایران د برید پلانونه یې تایید کړي، خو د دې لپاره یې انتظار کړی چې وګوري ایران به خپل اټومي پروګرام پرېږدي که نه.
