پاکستان د اختر په مناسبت د افغانستان پر وړاندې لنډمهاله اوربند اعلان کړ.
پاکستان د کوچني اختر په مناسبت د افغانستان پر وړاندې خپل بریدونه په لنډمهاله توګه د درولو اعلان وکړ. د پاکستان د اطلاعاتو وزیر، عطاء الله تارړ وویل چې دا اوربند یې د تورکیې، سعودي عربستان او قطر په غوښتنه اعلان کړی دی.
دا اعلان په داسې حال کې کېږي چې په افغانستان کې د ملګرو ملتونو مرستندویه پلاوي (یوناما) ویلي وو، د دوشنبې په شپه په کابل کې د روږدو کسانو د درملنې پر یو مرکز د پاکستان په هوايي برید کې لږ تر لږه ۱۴۳ کسان وژل شوي دي. خو طالبانو بیا د وژل شویو کسانو شمېر تر ۴۰۰ ډېر او د ټپیانو شمېر ۲۶۵ تنه ښودلی و.
پاکستان هغه ادعاوې رد کړې چې ګواکې روغتون یې په نښه کړی او وایي چې په دغو بریدونو کې یې په خورا "دقت سره پوځي تاسیسات او د ترهګرو ملاتړې زیربناوې" ویشتلې دي.
د افغانستان او پاکستان ترمنځ دغه جګړه، چې ۲۶۰۰ کیلومتره ګډه پوله لري، د دواړو ګاونډیو هیوادونو په تاریخ کې تر ټولو بد پړاو ګڼل کېږي. دغه نښتې تېره میاشت وروسته له هغه خورا سختې شوې چې پاکستان په افغانستان کې د وسله والو پر اډو د هوايي بریدونو ادعا وکړه.
پاکستان ادعا کوي چې پر دغه هیواد برید کونکي وسله وال په افغانستان کې پټ دي، خو طالبان دا تورونه ردوي او وایي چې د وسله والو سره مبارزه د پاکستان کورنۍ موضوع ده. د طالبانو د بهرنیو چارو د وزیر، امیر خان متقي دفتر ویلي چې افغانستان د ډیپلوماټیک حل په برخه کې پر پاکستان خپل باور له لاسه ورکړی دی.
"داسې وه لکه د قیامت ورځ"
د طالبانو ویاند ذبیح الله مجاهد زیاته کړه چې په برید کې وژل شوي کسان اکثره ملکیان او هغه روږدي وو چې تر درملنې لاندې وو. عیني شاهدانو ویلي چې درې بمونه هغه مهال وچاودېدل چې په مرکز کې خلکو د ماښام لمونځ تازه خلاص کړی و؛ دوه بمونه مستقیماً د ناروغانو خونو او لیلیو ته نږدې لګېدلي وو.
یو ۵۰ کلن کس چې احمد نومېږي او په دغه مرکز کې تر درملنې لاندې و، د پېښې کیسه داسې کوي: "هر ځای ته ناڅاپه اور واخیست. داسې وه لکه د قیامت ورځ. زما ملګري زما د سترګو وړاندې سوځېدل او موږ ونه شو کولی چې ټول وژغورو."
