د امريکا د بهرنيو چارو وزير مارکو روبيو او د روسيې د بهرنيو چارو وزير سرګي لاوروف د اوکراين د جګړې د پای ته رسولو په اړه د خبرو اترو د راتلونکي پړاو په اړه خبرې وکړې.
د امريکا د بهرنيو چارو وزارت وياندې تامي بروس د شنبې په ورځ وويل چې دواړو لوړپوړو ديپلوماتانو "هوکړه وکړه چې د امريکا او روسيې ترمنځ د اړيکو د بيا رغولو لپاره کار ته دوام ورکړي."
په دې بيان کې د امريکا او روسيې د خبرو اترو د راتلونکي پړاو د پيل په اړه، چې سعودي عربستان يې کوربه دی، کوم جزئيات نه دي ورکړل شوي.
روبيو لاوروف ته د منځني ختيځ د پوځي فعاليتونو په اړه هم معلومات ورکړل، چيرته چې د امريکا ځواکونو په يمن کې د حوثيانو پر وړاندې مرګوني بريدونه ترسره کړل، د بيان له مخې.
د امريکا ځواکونو په يمن هوايي بريدونه وکړل چې لږ تر لږه ۲۰ کسان يې ووژل، په داسې حال کې چې ولسمشر ډونالډ ټرمپ خبرداری ورکړ چې "که دغه ډله د سور سمندر د کښتيو پر وړاندې بریدونو ته دوام ورکړي، نو سخت غبرګون به وويني."
د ولسمشر ډونالډ ټرمپ او د اوکراين د ولسمشر ولاديمير زيلينسکي ترمنځ د وروستيو کړکېچونو سره سره، کيف په اصولو کې د امريکا په منځګړيتوب د ۳۰ ورځو بې قيد او شرط اوربند سره موافقه کړې، که چېرې مسکو په ختيځ اوکراين کې خپل بریدونه ودروي.
د روسيې ولسمشر ولاديمير پوتين بيا د اوربند سره موافقه نه ده کړې، بلکې داسې شرطونه يې وړاندې کړي چې د امريکا او اوکراين د هوکړې څخه ډېر لوړ دي.
