د عراق لومړي وزیر علي الزیدي پدې خبري غونډه کې وویل چې  "موږ کولای شو تورکیې ته په ورځ کې یو میلیون بېرله تېل ورکړو."

د تورکیې ولسمشر رجب طیب اردوغان وویل: "موږ هڅه کوو چې زموږ سیمه نور د جګړې، ترهګرۍ او شخړو پر ځای، د پرمختګ، سوکالۍ، ارامۍ او ثبات سره  وپېژندل شي."

ولسمشر اردوغان په ولسمشرۍ ماڼۍ کې د عراق له لومړي وزیر علي الزیدي سره، چې د یو رسمي سفر په ترڅ کې انقرې ته راغلی، تر دوه اړخیزو او د پلاوو ترمنځ لیدنو وروسته په بېلابېلو برخو کې د همکاریو د تړونونو د لاسلیک په مراسمو کې ګډون وکړ.

وروسته په یوه ګډه خبري غونډه کې، اردوغان الزیدي ته د هغې دندې له امله چې په دې حساس وخت کې یې په غاړه اخیستې، یو ځل بیا مبارکي وویله. اردوغان وویل چې د وروګلوۍ پر بنسټ یې پر ټولو اړیکو خبرې کړي او "د ایران، سوریې او فلسطین په ګډون یې د سیمه ییزو پرمختګونو په اړه د نظرونو تبادله کړې ده."

اردوغان زیاته کړه چې د ګاونډیو هېوادونو د جګړې له امله په خبرو اترو کې امنیت، له ترهګرۍ سره مبارزه، انرژي او ټرانسپورټ مهم موضوعات وو. هغه وویل:
"زموږ ګاونډی هېواد عراق له بده مرغه له دې جګړو او بې ثباتۍ څخه تر ټولو زیات اغېزمن شوی دی. موږ له پخوا راهیسې د عراق امنیت او ثبات له خپل هېواد څخه جلا نه دي ګڼلي. موږ له ترهګرۍ پاکې یوې تورکیې او سیمې لپاره له خپلو عراقي وروڼو سره په نږدې ډیالوګ کې یو."

ولسمشر اردوغان یادونه وکړه چې د تورکیې پټرولیم (TP) شرکت ته د کرکوک په تولیدي ساحه کې شراکت ورکړل شوی، چې مخکې یې چارې د برېتش پټرولیم (BP) لخوا پر مخ وړل کېدې. هغه وویل: "موږ غواړو له عراق سره د سوداګرۍ کچه، چې تېر کال ۱۷ میلیارده ډالرو ته نږدې شوې وه، لا پسې لوړه کړو."

"د عراق ۱ میلیون بېرله تېل زموږ اړتیاوې پوره کوي"
ولسمشر اردوغان د عراق د لومړي وزیر علي الزیدي خبرو ته په اشارې، چې ویلي یې و "موږ کولای شو تورکیې ته په ورځ کې یو میلیون بېرله تېل ورکړو"، وویل:
"هغه (الزیدي) وايي چې بل چا ته اړتیا مه لرئ، موږ به یو میلیون بېرله درکړو. ان شاء الله که موږ له خپل ګاونډي عراق څخه دلته په ورځ کې یو میلیون بېرله تېل انتقال کړو، نو زموږ ټولې اړتیاوې به پوره کړي."