د امریکا مرستیال ولسمشر رسنیو ته په خپلو څرګندونو کې وویل چې د اوږدې جګړې "هېڅ امکان نشته"؛ هغه ټینګار وکړ چې پخواني عملیات محدود وو او ډیپلوماسي لا هم تر ټولو غوره انتخاب دی.
د امریکا مرستیال ولسمشر جې ډي وېنس وویل، متحده ایالات به په منځني ختیځ کې په یوې بې پایلې جګړې کې ښکېل نه شي، په داسې حال کې چې ولسمشر ډونالډ ټرمپ د ایران سره د اټومي خبرو اترو په منځ کې د دغه هېواد پر وړاندې پر پوځي انتخابونو غور کوي.
وېنس، چې له ویسکانسین څخه واشنګټن ته د ستنېدو پر مهال یې له واشنګټن پوسټ ورځپاڼې سره خبرې کولې، د کلونو اوږدې جګړې نظریه رد کړه. هغه پوسټ ته وویل: "دا فکر چې موږ به په منځني ختیځ کې په یوې داسې جګړه کې ښکېل شو چې پای یې نه ښکاري او کلونه دوام وکړي؛ د داسې یو څه د پېښېدو هېڅ امکان نشته."
دا څرګندونې په داسې حال کې کېږي چې متحده ایالاتو او ایران د پنجشنبې په ورځ په جنیوا کې د تهران د اټومي پروګرام په اړه د لوړې کچې خبرو اترو په دوام کې د غیر مستقیمو خبرو دریم پړاو ترسره کړ. ایراني چارواکو، د نظرونو د اختلاف سربېره، دا خبرې جدي او ګټورې وبللې.
وېنس تېر کال په ایران کې ترسره شوي پوځي عملیات او د جنورۍ په میاشت کې د وینزویلا د ولسمشر نیکولاس مادورو نیول د هغو عملیاتو د بېلګو په توګه یاد کړل چې پولې او اهداف یې روښانه وو. هغه وویل، دغو اقداماتو روښانه موخې او د پای ټکي لرل.
د امریکا مرستیال ولسمشر وویل چې هغه لا هم ځان "په بهرنیو پوځي مداخلو شکمن کس" ګڼي. هغه پوسټ ورځپاڼې ته وویل: "زه فکر کوم چې موږ ټول د ډیپلوماټیک انتخاب ملاتړ کوو. خو دا حالت په اصل کې په دې پورې تړلی چې ایرانیان به څه کوي او څه وايي."
کله چې د تېرو جګړو د درسونو په اړه ترې وپوښتل شول، وېنس خبرداری ورکړ چې دا درسونه باید هېر نه کړل شي او نه هم په ړوند ډول تکرار شي. هغه وویل: "زه فکر کوم چې موږ باید د تېر وخت د تېروتنو له تکرار څخه ډډه وکړو. په ورته وخت کې، باید د تېر وخت له درسونو څخه له حده زیاتې پایلې هم ونه باسو." وېنس زیاته کړه: "یوازې دا چې یو ولسمشر یوه پوځي جګړه خرابه کړه، د دې مانا نه ده چې موږ به بیا هېڅکله په کوم پوځي بهیر کې ښکېل نه شو."
له بلې خوا، د ایران د بهرنیو چارو وزیر عباس عراقچي د جنیوا غونډه یوه "ګټوره" ناسته وبلله چې پرمختګ په کې شوی او ویې ویل چې د خبرو نوی پړاو به شاوخوا یوه اونۍ وروسته ترسره شي. عراقچي د ایران دولتي رسنیو ته په مرکه کې وویل: "البته، لا هم د نظر اختلافونه شته، چې دا طبیعي ده؛ خو د تېر په پرتله دواړه خواوې یوې هوکړې ته د رسېدو لپاره ډېره جدي اراده ښيي."
د ټرمپ "ملت ته وینا" د ایران د توغندیز پروګرام او اټومي هیلو په اړه اندېښنې زیاتې کړې، سره له دې چې چارواکي ډیپلوماسۍ ته دوام ورکوي.
