د پاکستان په کراچۍ ښار کې په یوه سوداګریز مرکز کې د سترې اورلګېدنې له امله لږ تر لږه شپږ کسان وژل شوي
د اور وژنې ادارې مشر وايي، په دغه مرکز کې شاوخوا ۱۲۰۰ دوکانونه دي، چې د جامو، برېښنايي وسایلو، سينګار توکو او لوښو دوکانونه پکې شامل دي او همدې توکو اور لا پسې شدید کړی دی.
چارواکو ویلي، د پاکستان په سوداګریز ښار کراچۍ کې په یوه سوداګریز مرکز کې د سختې اورلګېدنې له امله لږ تر لږه شپږ کسان، چې یو اور وژونکی هم پکې شامل دی، وژل شوي او ګڼ نور ټپیان شوي دي.
د کراچۍ میټروپولیټن کارپوریشن (KMC) د اور وژنې ادارې مشر همایون خان خبریالانو ته وویل، چې اور د شنبې په شپه د اېم اې جناح روډ په ګل پلازا شاپینګ سنټر کې ولګېد او لا هم دوام لري، ځکه اور وژونکي يې په قابو کولو کې له ستونزو سره مخ دي.
هغه زیاته کړه چې په دغه مرکز کې شاوخوا ۱۲۰۰ دوکانونه دي، چې د جامو، برېښنايي وسایلو، سينګار توکو او لوښو دوکانونه پکې شامل دي او همدې توکو اور لا پسې شدید کړی دی.
د کراچۍ د اور وژنې ادارې یوه ویاند د یکشنبې په ورځ وویل: "تر اوسه له پېښې ځایه شپږ جسدونه را ایستل شوي، چې یو یې د اور وژونکي دی."
"ټیمونه له نږدې کار کوي ترڅو وضعیت عادي حالت ته راولي."
د مړو شمېر د ایدهي فاونډېشن لخوا هم تایید شوی، چې یوه غیر انتفاعي امبولانس او خیریه اداره ده.
د سیند ګورنر کامران ټیسوري، چې له سیمې څخه یې لیدنه وکړه، وویل چې اور وژونکي د اور د کنټرولولو او د هغو کسانو د ژغورلو لپاره کار کوي چې ممکن لا هم دننه بند پاتې وي.
هغه وویل: "ریسکیو ۱۱۲۲ او اور وژونکي هڅه کوي چې اور مهار کړي، کوم چې ټولې ودانۍ ته خپور شوی دی."
د ریسکیو ۱۱۲۲ چارواکو تایید کړه چې د بېلابېلو ادارو ۲۰ د اور وژنې ګاډي ځای پر ځای شوي دي.
خو چارواکو خبرداری ورکړی چې ودانۍ زړه او له ساختماني پلوه کمزورې ده، او د ژغورنې عملیات په ډېر احتیاط سره ترسره کیږي.
