پوتین د سوریې له بهرنیو او دفاع وزیرانو سره د ستراتیژیکو همکاریو په اړه خبرې وکړې

د روسیې ولسمشر د اسراییلو د سرغړونو پر وړاندې د سوریې ملاتړ بیا تکرار کړ او دا یې د سیمه ییز ثبات لپاره ګواښ وباله.

د سوریې رسمي خبري اژانس سانا د راپور له مخې، د روسیې ولسمشر ولادیمیر پوتین په مسکو کې د سوریې د بهرنیو چارو له وزیر اسعد الشیباني او د دفاع له وزیر مرهف ابو قصرا سره وکتل.

خبري اژانس زیاته کړې، چې د سه‌شنبې په ورځ په دې کتنه کې د دواړو هېوادونو د ګډو ګټو اړوند یو لړ سیاسي، پوځي او اقتصادي مسایلو باندې خبرې وشوې، چې ځانګړی تمرکز یې په پوځي او دفاعي صنعت برخو کې پر ستراتیژیکو همکاریو و.

د سانا په وینا، په خبرو کې د اقتصادي او سوداګریزو همکاریو د پراختیا پر امکاناتو هم بحث وشو، چې په کې د بیارغونې پروژو ملاتړ، د زیربناوو سکټورونو پراختیا، په سوریه کې د پانګونې هڅونه، د سوداګرۍ تبادلې زیاتول او د شراکتونو اسانول شامل وو؛ هغه ګامونه چې تمه کیږي د سوریې پر اقتصاد او د ژوند شرایطو پر ښه والي مثبت اغېز وکړي.

خبري اژانس ویلي، پوتین د سوریې لپاره د روسیې پر ټینګ ملاتړ بیا ټینګار وکړ، د سوریې د ځمکنۍ بشپړتیا او بشپړ حاکمیت پر ساتنې یې ټینګار وکړ او د هېواد د وېشلو یا د هغه د خپلواک ملي تصمیم نیونې د کمزوري کولو هر ډول پروژې یې رد کړې.

پوتین د اسراییلو د سرغړونو پر وړاندې د سوریې ملاتړ کوي

خبري اژانس زیاته کړې، هغه همدارنګه د سوریې پر خاوره د اسراییلو پر پرله پسې سرغړونو د مسکو مخالفت بیا تکرار کړ او دا یې د سیمه ییز ثبات او امنیت لپاره مستقیم ګواښ وباله.

دا غونډه د سوریې د ولسمشر احمد الشرع له لوري د اکتوبر په ۱۵ مه مسکو ته تر سفر وروسته ترسره کیږي، چې د ۲۰۲۴ کال په وروستیو کې د پخواني ولسمشر بشارالاسد له ګوښه کېدو وروسته دا د هغه لومړی سفر و.

اسد، چې نږدې ۲۵ کاله د سوریې د رژیم مشر و، د ۲۰۲۴ کال د ډسمبر په ۸ مه روسیې ته وتښتېد، چې په دې سره د بعث ګوند رژیم چې له ۱۹۶۳ کال راهیسې واکمن و، پای ته ورسېد.