د انګلستان د بهرنیو چارو وزیر ویلي دي چې په پراخیدونکې جګړه کې عسکري بریدونه د ایران د پوځي پرمختګ مخه نیولی نشي.

 د بریتانیا د بهرنیو چارو وزیر ویلي چې د اسرائیل او ایران ترمنځ جګړه د منځني ختیځ لپاره د جدي خطر یوه شېبه ده، او خبرداری یې ورکړی چې یوازې پوځي اقدام د ایران د اټومي یا پوځي پرمختګ مخه نشي نیولی.

ډیویډ لامي د ولسي جرګې غړو ته په وینا کې، تایید کړه چې اسرائیل په  ایران کې په ځانګړې توګه پوځي او اټومي تاسیساتو، پراخ بریدونه کړي دي، او لوړپوړي شخصیتونه یې هم په نښه کړي دي.

ایران په ځواب کې د بالستیک توغندیو بریدونه وکړل، چې د پراخې سیمه‌ییزې جګړې وېره یې زیاته کړه.

لامي وویل چې د اسرائیل په پوځي برید کې بریتانیا ښکېله نه وه، خو د اسرائیل د امنیت لپاره یې د لندن ملاتړ بیا تایید کړ. هغه پارلمان ته وویل: "هیڅ پوځي اقدام نشي کولای د ایران وړتیاوې ختمې کړي،" او د ډیپلوماسۍ د بیا پیل اړتیا یې په ګوته کړه.

هغه وویل چې د بریتانیا سمدستي تمرکز د خپلو اتباعو پر خوندیتوب دی، او یادونه یې وکړه چې د مصر او اردن په ګډون سیمې ته د بحران ټیمونه استول شوي ترڅو اتباعو ته د وتلو په برخه کې مرسته وکړي. په اغېزمنو سیمو کې د بریتانیا اتباعو ته ویل شوي چې د مرستې لپاره دې د بهرنیو چارو دفتر سره ځانونه ثبت کړي.

لامي د پراخې بې‌ثباتۍ خطر ته اشاره وکړه، په ځانګړې توګه په غزه کې روان تاوتریخوالی، په لبنان، سوریه او عراق کې کړکېچونه، او په سور سمندر کې د حوثیانو بریدونه یې یاد کړل.

هغه د هر ډول کړکېچ د اقتصادي اغېزو په اړه خبرداری ورکړ، په ځانګړې توګه د هرمز تنګي ستراتیژیک اهمیت او د نړیوالو تېلو په عرضه کې د ایران رول ته په اشاره سره.

لامي د زغم غوښتنه وکړه او ویې ویل چې د جګړې ژورېدل "به جدي او نه‌پېشبیني کېدونکي پایلې ولري" او دواړو خواوو نه يي د زغم غوښتنه وکړه. هغه وویل: "دا یو پوځي اقدام دی چې د اسرائیل لخوا ترسره شوی." او زیاته یې کړه: "بریتانیا په دې کې ښکېله نه ده."