دا امر وروسته له هغه کېږي چې سعودي عربستان وویل، د الخرج په ولایت کې د یوې ناڅرګندې مرمۍ (توغندي) د لګېدو له امله دوه کسان وژل شوي دي.
د امریکا د بهرنیو چارو وزارت ویلي، هغوی "د حکومت غیر بېړنیو کارکوونکو او د هغوی د کورنیو غړو" ته امر کړی چې په سیمه کې د مخ په زیاتیدونکي امنیتي خطرونو له امله له سعودي عربستان څخه ووځي.
د یکشنبې په ورځ په یوه لنډه اعلامیه کې ویل شوي چې دا پرېکړه د احتیاطي تدابیر په توګه نیول شوې ترڅو د روانو امنیتي پرمختګونو په ترڅ کې د امریکایي اتباعو او ډیپلوماټیکو کارکوونکو خوندیتوب ډاډمن شي.
وزارت د هغو ځانګړو ګواښونو په اړه جزیات نه دي ورکړي چې د دې امر لامل شوي، خو دا اقدام په داسې وخت کې کېږي چې په ټوله سیمه کې پوځي او امنیتي کړکېچ خورا زیات شوی دی. په ورته حالاتو کې، متحده ایالات ډیری وختونه په هغو هېوادونو کې چې له امنیتي خطرونو سره مخ دي، خپل غیر ضروري پرسونل کموي، خو د خپلو ماموریتونو د دوام لپاره اصلي ډیپلوماټیک کدر ساتي.
د یکشنبې په ورځ سعودي عربستان وویل چې د الخرج په ولایت کې د یوې مرمۍ د لګېدو له امله دوه کسان وژل شوي او دولس نور ټپیان شوي دي.
ایران هوډ څرګند کړی چې د فبرورۍ په ۲۸مه د متحده ایالاتو او اسرائیل له خوا د هغه پراخ برید بدل به واخلي چې د هېواد ستر مذهبي مشر علي خامنه اي پکې ووژل شو. د ایران ولسمشر مسعود پزشکیان د شنبې په ورځ له ګاونډیو هېوادونو څخه د بریدونو له امله بښنه وغوښته، خو وروسته یې وویل چې که دا هېوادونه پر ایران د برید لپاره وکارول شي، ایران به "ځواب ورکولو ته اړ شي."
