اوچا په خپل وضعیت راپور کې ویلي، دا جګړې د جنورۍ له ۱۲مې تر ۱۶مې نېټې پورې د روتشورو په سیمه کې په لسګونو کلیو کې رامنځته شوې، چې د بوکومبو، کیهونډو، موتاندا، بامبو او ټونګو ډلې یې اغېزمنې کړې دي.

راپور زیاتوي، په دې نښتو کې ګڼ شمېر کسان ټپیان شوي او ډېر نور اړ شوي چې خپل کورونه پرېږدي او ګاونډي ماسیسي سیمې ته پناه یوسي.

دا نښتې د AFC/M23 یاغیانو او د وازالینډو په نوم د حکومت پلوه ملیشو ترمنځ شوې دي.

د همدې راپور له مخې، د جنورۍ په لومړیو کې په یوه بله پېښه کې، د ماسیسي په مرکز کې د یاغیانو پر مرکزونو د پوځ په هوایي برید کې ۱۱ کسان وژل شوي او شاوخوا ۴۰ نور ټپیان شوي وو.

ماتېدونکی اوربند

د کانګو سیند اتحاد  چې د M23 جنګیالي هم په کې شامل دي، په سیمه کې د جګړې په مرکز کې ځای لري.

دا ډله، چې ملګري ملتونه او لوېدیځ هېوادونه وایي د ګاونډي روانډا له خوا یې ملاتړ کیږي، د کانګو په ختیځ کې د پام وړ سیمې کنټرولوي، چې د ۲۰۲۵ کال په لومړیو کې نیول شوي د ګوما او بوکاوو ولایتي مرکزونه هم پکې شامل دي.

تېره اونۍ، د کانګو ولسمشرۍ وویل چې د انګولا له خوا د حکومت او AFC/M23 ترمنځ وړاندیز شوی اوربند یې منلی، چې د فبرورۍ له ۱۸مې څخه به نافذ وي.

خو د چهارشنبې په ورځ لا هم روښانه نه وه چې ایا دا اوربند د دواړو خواوو له خوا مراعت کیږي.

وروستۍ تاوتریخوالی په شمالي کیوو کې روانه بې ثباتي په ګوته کوي، سره له دې چې په دې منرالي بډایه سیمه کې د جګړې د درولو لپاره ډیپلوماتیکې هڅې روانې دي.