د ایران د بهرنیو چارو وزیر عباس عراقچي وویل، متحده عربي اماراتو پر ایران په بریدونو کې "مستقیم لاس" درلود.

د ایراني دولتي رسنیو د راپور له مخې، د ایران د بهرنیو چارو وزیر د پنجشنبې په ورځ په نوي ډیلي کې د بریکس (BRICS) د غونډې پر مهال متحده عربي امارات د خپل هېواد پر وړاندې په پوځي عملیاتو کې په مستقیمه ښکېلتیا تورن کړل.

دا لفظي شخړه یوه ورځ وروسته له هغه رامنځته کېږي چې متحده عربي اماراتو د اسرائیل د لومړي وزیر بنیامین نتنیاهو هغه وینا رد کړه چې ګواکې د ایران د جګړې پر مهال یې له دغه خلیجي هېواد څخه لیدنه کړې وه. عراقچي دمخه د دغې موضوع په اړه غبرګون ښودلی و او ویلي یې وو چې "هغه کسان چې د نفاق اچولو لپاره له اسرائیل سره همکاري کوي، حساب به ورسره وشي."

دولتي رسنیو د متحده عربي اماراتو د استازي د څرګندونو په ځواب کې د عراقچي له قوله ویلي: "ما د یووالي په خاطر په خپله (بریکس) وینا کې د متحده عربي اماراتو نوم وانخیست. خو حقیقت دا دی چې متحده عربي امارات زما د هېواد پر وړاندې په تېري کې په مستقیم ډول ښکېل وو. کله چې بریدونه پیل شول، دوی حتی یو غندونکی بیان هم خپور نه کړ."

ایراني دولتي رسنیو دا روښانه نه کړه چې د اماراتو استازي څه ویلي وو.

د راپورونو له مخې، عراقچي استدلال وکړ چې نه د امریکا اډې او نه هم له اسرائیل سره اتحاد متحده عربي اماراتو ته امنیت ورکولی شي او دغه هیواد باید د ایران په وړاندې پر خپل سیاست بیا کتنه وکړي.

عراقچي زیاته کړه: "موږ باید په سوله کې یو بل ته څېرمه ژوند وکړو، او دا د دواړو هیوادونو ترمنځ سوله ییزو اړیکو او بشپړ تفاهم ته اړتیا لري."

د ایران جګړه د فبرورۍ په ۲۸مه پر ایران د امریکا او اسرائیل له بریدونو سره پیل شوه، چې تهران ورته په خلیجي هیوادونو کې پر امریکایي اډو او نورو اهدافو د توغندیو او ډرون بریدونو په واسطه ځواب ورکړ.

وال سټریټ ژورنال د دوشنبې په ورځ یو راپور خپور کړ چې پکې ویل شوي متحده عربي اماراتو د اپریل په لومړیو کې پر ایران بریدونه کړي دي. لویدیځو او ایراني چارواکو دا هم ویلي چې سعودي عربستان هم پر ایران یو شمېر نااعلان شوي بریدونه کړي دي.

ایراني رسنیو شک څرګند کړی چې آیا په هند کې د بریکس د بهرنیو چارو وزیرانو د غونډې ګډونوال به د ایران او متحده عربي اماراتو ترمنځ د اختلافاتو له امله وکولای شي یوه وروستۍ ګډه اعلامیه خپره کړي. د بهرنیو چارو د وزارت مرستیال کاظم غریب آبادي ویلي چې د متحده عربي اماراتو د شتون له امله "ستونزې او ارتباطي خنډونه" شتون لري.