تورکیې او ملګروملتونو په دمشق کې په یو کلیسا کې ځانمرګی برید په کلکو ټکو وغنده .
د تورکیې د بهرنیو چارو وزارت او د سوریې لپاره د ملګرو ملتونو ځانګړي استازي په دمشق کې په یوه کلیسا کې د ځانمرګي برید غندنه کړې ده، چې په ترڅ کې یې ګڼ شمېر ملکي وګړو ته مرګ ژوبله اوښتې ده. دواړو خواوو د ترهګرۍ پر وړاندې د یووالي غوښتنه وکړه.
ګیر پیډرسن د یکشنبې په ورځ، د دمشق په دوئیله سیمه کې د مار الیاس کلیسا کې د ترسره شوي "ترهګریز برید" غندنه وکړه، چې د عبادت پر مهال پر ملکي وګړو شوی دی.
پیډرسن وویل: "زه په کلکو ټکو سره هغه ترهګریز برید غندم چې د عبادت پر مهال پر ملکي وګړی شوی دی." هغه ددې پېښې په اړه د بشپړې څېړنې او د چارواکو له خوا د جدي اقداماتو غوښتنه وکړه.
تورکیې هم دغه برید وغنده، چې د سوریې د روغتیا وزارت په وینا لږ تر لږه ۲۰ کسان یې وژلي او ۵۲ نور یې ټپیان کړي دي.
د وزارت په وینا، یو ځانمرګي بریدګر چې د داعش ترهګرې ډلې سره تړاو لري، لومړی د کلیسا دننه ډزې وکړې او بیا یې ځان وچاوه.
د تورکیې د بهرنیو چارو وزارت په یوه بیان کې وویل چې دغه برید د سوریې د بې ثباته کولو او ټولنیز یووالي د ګډوډولو هڅه ده.
وزارت زیاته کړه: "دا برید د سوریې د ثبات او امنیت د ټینګښت هڅې کمزورې کول غواړي او د ټولنیز سولې او همغږۍ ګډوډولو ته لار هواروي."
انقرې د سوریې د ملي حاکمیت او یووالي څخه یو ځل بیا خپل ملاتړ څرګند کړ او ژمنه یې وکړه چې "ټولې اړینې مرستې به وړاندې کړي" او د سوریې د خلکو په زغم او مقاومت یې باور څرګند کړ.
دغه ځانمرګی برید یوازې څو اونۍ وروسته له هغې ترسره شو چې د سوریې د کورنیو چارو وزارت د مې په ۲۶مه د دمشق په کلیوالو سیمو کې د داعش د ترهګریزو ډلو د موندلو اعلان وکړ.
امنیتي ځواکونو د عملیاتو پر مهال سپکې او منځنۍ وسلې ضبط کړې.
د اسد د پخواني رژیم له پای ته رسېدو راهیسې، د سوریې امنیتي ځواکونه د هغو کسانو پر وړاندې عملیات کوي چې په جرمونو، د بشري حقونو په سرغړونو او د ترهګرۍ اړوند فعالیتونو تورن دي.
