د ایران د بهرنیو چارو مرستیال وزیر وايي، که امریکايي سرتېري ځای پر ځای شي، ممکن یوې اوږدې جګړې ته راښکل شي.
د ایران د بهرنیو چارو مرستیال وزیر سعید خطیب زاده د دوشنبې په ورځ له سکای نیوز سره په یوه خپره شوې مرکه کې وویل: "یوازې هغه څه ولولئ چې په ویتنام کې وشول."
هغه وویل، امریکايي سرتېري په ایران کې له ورته برخلیک سره مخ کېدای شي.
هغه زیاته کړه: "دوی پوهېږي هغه کسان چې دوی یې دې جګړې ته راکش کړل، کولی شي دوی یوه جنجال ته هم راوباسي."
خطیب زاده وویل، ایران چمتو دی چې د اړتیا تر وخته جګړې ته دوام ورکړي او دا مهال پر دیپلوماتیک حل تمرکز نه کوي.
دغه جګپوړي ایراني ډیپلومات د خبرو اترو امکان رد نه کړ، خو ویې ویل چې دا د متحده ایالاتو او متحدینو پورې اړه لري چې داسې یوه طرحه وړاندې کړي چې جګړې ته قطعي پای ټکی کېږدي.
اسرائیل، امریکا جګړې ته راکش کړه
خطیب زاده د اسرائیل پر لومړي وزیر بنیامین نتنیاهو هم تور ولګاوه چې امریکا یې جګړې ته راکش کړې ده.
"دوی باید له ایران سره د معاملې پر مهال دوه ځله فکر وکړي او د هغو کسانو مشوره وانخلي چې ایران نه پېژني، او چا چې لسیزې غوښتل د امریکايي مالیه ورکونکو او امریکايي سرتېرو په وینو د ایران پر وړاندې جګړه وګټي."
هغه وویل: "نتنیاهو او اسرائیلي رژیم خپله اجنډا لري چې دا جګړه د نورو ټولو په زیان، د ځان لپاره په بریا بدله کړي."
د ایران د نوي ستر مذهبي مشر مجتبی خامنه يي روغتیا ته په اشارې، خطیب زاده وویل چې هغه "روغ او د چارو واک په لاس کې لري،" سره له دې چې په عام محضر کې نه دی راڅرګند شوی.
وروسته له هغه چې اسرائیل او امریکا د فبرورۍ په ۲۸مه پر ایران ګډ بریدونه پیل کړل او تر دې دمه یې د هغه وخت د ستر مذهبي مشر علي خامنه يي په ګډون شاوخوا ۱۳۰۰ کسان وژلي، دښمنۍ ډېرې شوې دي.
ایران یې په ځواب کې د بې پیلوټه الوتکو او توغندیو بریدونه کړي چې اسرائیل، اردن، عراق او هغه خلیجي هېوادونه یې په نښه کړي چې د امریکا پوځي شتمنۍ په کې دي.
د دې میاشتې په پیل کې، مجتبی خامنه يي د خپل پلار، علي خامنه يي، ځایناستی اعلان شو.
