په روسیه کې د افغانستان په اړه د "مسکو فارمټ" مشورتي غونډه جوړه شوه
- د افغانستان لپاره د روسیې د ولسمشر ولادیمیر پوتین ځانګړی استازی ضمیر کابلوف:
- "روسیه په افغانستان کې د اډې جوړولو پلان نه لري"
- "موږ نه یوازې د امریکا، بلکې د ټولو هغو هېوادونو له خوا د سفارتونو د پرانیستلو ملاتړ کوو چې له افغانستان سره د اړیکو ښه کولو او د ملاتړ برابرولو ته چمتو دي" –
د روسیې په پلازمېنه مسکو کې د افغانستان په اړه د "مسکو فارمټ" مشورتي غونډه جوړه شوه.
دا غونډه چې د مسکو په یوه هوټل کې اووم ځل جوړه شوه، د روسیې د بهرنیو چارو وزیر سرګي لاوروف او د افغانستان د حکومت د بهرنیو چارو وزیر امیرخان متقي تر څنګ د هند، ایران، قزاقستان، قرغزستان، چین، پاکستان، تاجکستان، ترکمنستان او ازبکستان استازو ګډون کړی و.
په غونډه کې چې بیلاروس هم د مېلمه په توګه بلل شوی و، د رسنیو له پوښښ پرته ترسره شوه.
- "موږ په افغانستان کې د امریکا د سفارت د پرانیستلو هرکلی کوو"
د افغانستان لپاره د روسیې د ولسمشر ولادیمیر پوتین ځانګړي استازي ضمیر کابلوف د غونډې له پای ته رسېدو وروسته خبریالانو ته څرګندونې وکړې.
کابلوف د غونډې پر اهمیت ټینګار وکړ او داسې ارزونه یې وکړه: "دې غونډې وښوده چې د سیمې ټول هېوادونه هوډ لري چې د متقابلو ګټو پر بنسټ له افغان حکومت سره خپلې اړیکې پراخې کړي."
کابلوف وویل چې د افغانستان له خلکو سره باید د اقتصادي پرمختګ په برخه کې مرسته وشي.
نوموړي دې ته پام راواړاوه چې له غونډې مخکې د روسیې د بهرنیو چارو وزیر لاوروف د افغانستان د بهرنیو چارو له سرپرست وزیر متقي سره لیدلي وو او زیاته یې کړه: "متقي وویل چې افغان حکومت به پر خپله خاوره د هېڅ بهرنۍ اډې د ځای پر ځای کېدو اجازه ورنکړي. دا خبره د بګرام پر هوايي اډې هم پلي کېږي."
کابلوف په ټینګار سره وویل چې روسیه هم د دې کار مخالفه ده او زیاته یې کړه: "روسیه په افغانستان کې د اډې جوړولو پلان نه لري."
کابلوف په افغانستان کې د امریکا له خوا د سفارت د پرانیستلو د غوښتنې هرکلی وکړ او ویې ویل: "موږ نه یوازې د امریکا، بلکې د ټولو هغو هېوادونو له خوا د سفارتونو د پرانیستلو ملاتړ کوو چې له افغانستان سره د اړیکو ښه کولو او د ملاتړ برابرولو ته چمتو دي."
