اردوغان خبرداری ورکړی چې په غزه کې د نسل وژنې تکرار به 'درنه بیه' ولري

رجب طیب اردوغان وايي: "سولې ته باید یو چانس ورکړل شي او له ټولو ورانکارو کړنو څخه باید ډډه وشي."

د تورکیې ولسمشر رجب طیب اردوغان د جمعې په ورځ خبرداری ورکړ چې په غزه کې "د نسل وژنې چاپیریال" ته هر ډول بېرته ستنېدل به "ډېره درنه بیه" ولري، او په ورته وخت کې یې د اسرائیل او حماس ترمنځ د اوربند له هوکړې هرکلی وکړ.

د اسرائیل او حماس ترمنځ د پنجشنبې په سهار د مصر په شرم الشیخ کې د امریکا د ولسمشر ډونالډ ټرمپ له خوا د وړاندې شوي ۲۰ ماده ییز پلان پر بنسټ د اوربند هوکړه وشوه.

د دې پلان په لومړي پړاو کې سمدستي اوربند، د یرغمل شویو او بندیانو خوشې کول، په غزه کې یوې ټاکل شوې کرښې ته د اسرائیلو شاتګ، غزې ته د بشري مرستو رسول او د بیارغونې لپاره نړیوال ملاتړ شامل دي.

اردوغان د تورې بحیرې په ریزا ولایت کې د نویو تاسیساتو او پروژو د پرانیستې په مراسمو کې د وینا پر مهال وویل، تورکیې د دې لپاره چې "ژر تر ژره" په غزه کې سوله، امنیت او ثبات بېرته راشي، هر ممکن کار کړی او په راتلونکي کې به یې هم وکړي.

د اوربند هوکړې ته په اشارې، اردوغان ټینګار وکړ چې "اوس تر ټولو مهمه خبره دا ده چې ډاډ ترلاسه شي چې هوکړه ټکی په ټکی عملي کیږي،" او زیاته یې کړه چې انقره به په دې پروسه کې فعاله ونډه واخلي.

هغه وویل: "زموږ سیمې، او په ځانګړې توګه غزې، پوره وینه تویېدنه، ډله ییزې وژنې او اوښکې زغملي دي. سولې ته باید یو چانس ورکړل شي، او له ټولو ورانکارو کړنو څخه باید ډډه وشي."

اردوغان دا هوکړه د مخ پر وړاندې ننګونو سره سره د دایمي سولې په لور یو "لوی ګام" وباله. هغه وویل: "په غزه کې د دایمي سولې دروازه پرانیستل شوې ده. موږ وایو – نوره وینه تویېدنه دې نه وي."

امریکا تایید کړه چې اسرائیلي پوځ ژیړې کرښې ته د لومړي پړاو شاتګ بشپړ کړی دی. د دې هوکړې له مخې، حماس باید ۲۰ یرغمل شوي خوشې کړي او د ۲۸ کسانو جسدونه وسپاري، په داسې حال کې چې اسرائیل به ۲۵۰ هغه فلسطیني بندیان چې د عمر قید سزاګانې تیروي او ۱۷۰۰ هغه بندیان چې د ۲۰۲۳ کال د اکتوبر له ۷مې راهیسې نیول شوي، خوشې کړي.