د 'اکسیوس' خبري سایټ په وینا، سپینه ماڼۍ له تهران څخه د یوه روښانه سیګنال په تمه ده چې آیا هغوی د خبرو اترو راتلونکي پړاو لپاره اسلام اباد ته د خپل مذاکره کوونکي ټیم په لېږلو هوکړه کوي که نه.
د امریکا د رسنیو د راپورونو له مخې، د دغه هیواد د ولسمشر مرستیال جې ډي وانس به د سه شنبې په ورځ د ایران په اړه د خبرو اترو لپاره پاکستان ته سفر وکړي.
امریکایي خبري سایټ 'اکسیوس' د دوشنبې په ناوخته د دریو امریکایي سرچینو له قوله راپور ورکړی چې تمه کیږي وانس د سه شنبې په سهار د اسلام اباد پر لور روان شي، ترڅو له ایران سره د جګړې د پای ته رسولو لپاره د یوې احتمالي معاملې په اړه خبرې وکړي.
د راپور له مخې، سپینې ماڼۍ ټوله دوشنبه له تهران څخه د دې سیګنال انتظار کاوه چې آیا هغوی به اسلام اباد ته خپل مذاکره کوونکی ټیم واستوي که نه. منځګړو له ایراني چارواکو غوښتي چې په دې خبرو کې ګډون وکړي او یو پلاوی واستوي.
تهران تر اوسه اسلام اباد ته د پلاوي د لېږلو په اړه خپله پریکړه په رسمي ډول نه ده اعلان کړې. خو پاکستاني سرچینو 'نیویارک پوسټ' ته ویلي چې تهران "دویم پړاو خبرو ته لېوالتیا لري،" مګر په دې اړه لا "وروستۍ پریکړه نه ده شوې."
د 'نیویارک ټایمز' د راپور له مخې، احتمال شته چې سټیو ویټکوف، جارډ کوشنر او نور لوړ پوړي چارواکي هم په دې خبرو کې شتون ولري، خو دا جې ډي وینس دی چې د دې ماموریت د پام په مرکز کې قرار لري.
د امریکا د ولسمشر مرستیال ته د هغې جګړې څخه د وتلو د لارې موندلو مسؤلیت سپارل شوی چې په امریکا کې یې محبوبیت خورا کم شوی او د نړۍ پر اقتصاد او د انرژۍ د رسولو پر پیچلو شبکو یې فشار راوړی دی. دا ډیپلوماتیک بار په داسې حال کې پر اوږو ایښودل کیږي چې له تهران سره د اړیکو د بیا پرانیستلو هڅې لا دمخه پیل شوې دي، که څه هم تر اوسه یې بریا محدوده وه.
پاکستان د اپریل پر ۱۱مه او ۱۲مه د امریکا او ایران ترمنځ د لومړنیو مستقیمو خبرو اترو کوربه و. دا په ۱۹۷۹ کال کې د دواړو هیوادونو ترمنځ د ډیپلوماتیکو اړیکو له پرې کېدو وروسته د لوړې کچې لومړنۍ ناسته وه، خو هغه خبرې بې پایلې پای ته ورسېدې.
د یکشنبې په شپه په اسلام اباد کې سخت امنیتي تدابیر نیول شوي او چارواکو په ټول ښار کې د اضافي پولیسو د ځای پر ځای کېدو تایید کړی دی.
