د افغانستان او پاکستان ترمنځه په نښتو کې پاکستان د ۴۱۵ تنو د وژلو ادعاء کوي. افغانستان بیا د پاکستان د ادعاء په ردولو سره په نښتو کې د ۵۵ تنو د وژل کیدو یادونه کوي.
کابل ادعا کوي چې د پولې په اوږدو کې د غچ اخیستونکو عملیاتو له امله په نښتو کې ۵۵ ملکي وګړي وژل شوي، په داسې حال کې چې پاکستان وایي له ۴۰۰ ډېر افغان طالب ځواکونه یې وژلي او د ملکي وګړو په نښه کول ردوي.
د افغانستان او پاکستان ترمنځ په دې وروستیو کې تاوتریخوالی زیات شوی، چې دواړه لوري یو بل ته د درندو تلفاتو اړولو اړوند ضد او نقیضې ادعاوې کوي.
د افغان حکومت یوه ویاند د یکشنبې په ورځ وویل چې له پاکستان سره په نښتو کې ۵۵ ملکي وګړي وژل شوي دي. د افغان حکومت مرستیال ویاند حمدالله فطرت ویلي چې د پنجشنبې له ورځې راهیسې د ښځو او ماشومانو په ګډون ۵۵ ملکي وګړي وژل شوي او ۶۹ نور ټپیان دي. هغه زیاته کړه چې لږ تر لږه ۱۲ د استوګنې کورونه هم ویجاړ شوي او دغه مرګ ژوبله د پکتیکا، خوست، کونړ، ننګرهار او کندهار په ولایتونو کې رامنځته شوې ده.
بل لور ته پاکستان ټینګار کوي چې د "ځان د دفاع" په عملیاتو کې یې ډاډ ترلاسه کړی چې ملکي وګړي په نښه نه شي. د دغه هېواد د اطلاعاتو وزیر عطاءالله تارړ د یکشنبې په ورځ وویل چې د پنجشنبې له ورځې راهیسې په هوایي بریدونو او نښتو کې ۴۱۵ افغان طالبان او شکمن ترهګر وژل شوي او تر ۵۸۰ ډېر نور ټپیان شوي دي.
کابل بیا ادعا کوي چې په نښتو کې یې ۵۶ پاکستاني سرتېري وژلي دي.
د دواړو لورو د شمېرو له مخې، تر اوسه په ټولیزه توګه ۸۱ کسان وژل شوي دي. په وژل شویو کې ۱۲ پاکستاني سرتېري او یو ملکي وګړی شامل دي، په داسې حال کې چې کابل د خپلو ۱۳ سرتېرو د وژل کېدو او د ۵۵ ملکي وګړو د ژوند له لاسه ورکولو خبر ورکړی دی. یو پاکستانی سرتېری لا هم ورک دی. د اسلام اباد او کابل له خوا د مرګ ژوبلې دغه ادعاوې په خپلواکه توګه نه دي تایید شوې.
دواړو ګاونډیو هېوادونو ترمنځ اړیکې د پنجشنبې له ورځې راهیسې وروسته له هغې ترینګلې شوې، چې کابل د فبرورۍ په وروستیو کې د پاکستان تر هوایي بریدونو وروسته د پولې په اوږدو کې "غچ اخیستونکي عملیات" پیل کړل.
په یوه بل خبر کې، پاکستاني رسنیو د امنیتي سرچینو په حواله ویلي چې د شنبې په ورځ یې د قلعه سیف الله په سیمه کې د "ترهګرو" د نفوذ هڅه ناکامه کړې ده. د راپور له مخې، "د پاکستاني وسله والو ځواکونو له خوا د نفوذ د هڅې تر ناکامولو وروسته ګڼ شمېر ترهګر ووژل شول."
د فبرورۍ په وروستیو کې پاکستان په افغانستان کې په څو نقطو هوايي بریدونه وکړ چې له امله يي په لسګونو تنو ملکي وګړو ژوند د لاسه ورکړ. پاکستان وویل چې په "ترهګریزو اهدافو" يي هوایي بریدونه وکړل چې په پایله کې یې ۷۰ تنه ووژل، په داسې حال کې چې افغان چارواکو او ملګرو ملتونو بیا ویلي دي چې دا بریدونه پر ملکي سیمو شوي دي او د ملکي وګړو د وژل کېدو خبر يي ورکړی و، خو پاکستان دغه ادعاوې ردوي.
په وروستیو میاشتو کې اړیکې وروسته له هغې خرابې شوې چې پاکستان پر افغانستان تور لګوي چې ترهګر د افغانستان له خاورې فعالیت کوي، هغه تور چې کابل یې ردوي، سره له دې چې د تاوتریخوالي د کمولو په هڅو کې سیمه ییزې ډیپلوماټیکې اړیکې دوام لري.
