عراقچي: ایران او امریکا به 'ډېر ژر' د اټومي خبرو نوی پړاو ترسره کړي

د ایران د بهرنیو چارو وزیر عباس عراقچي د مسقط خبرې یو ښه پیل بولي او په ورته وخت کې د ایران پر اټومي حقونو او له واشنګټن سره د نورو خبرو لپاره پر خپل چمتووالي ټینګار کوي.

د ایران د بهرنیو چارو وزیر وویل چې له واشنګټن سره به د خبرو اترو یو نوی پړاو "ډېر ژر" ترسره شي، خو په عین حال کې یې ټینګار وکړ چې د یورانیمو غني کول د تهران "نه انکارېدونکی حق" دی او د باور رامنځته کول به وخت ونیسي.

عباس عراقچي وویل چې د جمعې په ورځ په عمان کې د خبرو لومړی پړاو "یو ښه پیل" و.

عراقچي د الجزیرې شبکې سره په یوه مرکه کې، چې ځینې برخې یې د هغه په رسمي ټیلیګرام چینل کې په پارسي ژبه خپرې شوې، وویل: "(اټومي) غني کول زموږ نه انکارېدونکی حق دی او باید دوام ومومي. ان په بمبارۍ سره هم دوی ونه توانېدل چې زموږ وړتیاوې له منځه یوسي."

هغه د مرکې په ترڅ کې، چې وروسته د الجزیرې له خوا په عربي ډوبله په برخو کې خپره شوه، زیاته کړه: "موږ چمتو یو چې د غني کولو په اړه یوه ډاډمن کوونکي تړون ته ورسېږو."

"د ایران اټومي قضیه یوازې د خبرو اترو له لارې حل کېدای شي."

د عراقچي دا څرګندونې یوه ورځ وروسته له هغه وشوې چې په مسقط کې له واشنګټن سره اټومي خبرې بیا پیل شوې، هغه هیواد چې د حکومت ضد لاریونونو په وړاندې د ایران د خونړي ځواب وروسته یې منځني ختیځ ته د الوتکو وړونکې کښتۍ یوه ډله استولې ده.

د جمعې ورځې خبرې له هغه وروسته لومړنۍ خبرې وې چې تېر کال پر ایران د اسرائیلو د بې ساري بمباریو وروسته د ایران او متحده ایالاتو ترمنځ اټومي خبرې ناکامې شوې وې، چې دغې بمبارۍ یوه ۱۲ ورځنۍ جګړه پیل کړه.

د جګړې پر مهال، امریکایي جنګي الوتکو د ایران اټومي تاسیسات بمبار کړل.

عراقچي د جمعې ورځې خبرې "یو ښه پیل" وباله، خو ټینګار یې وکړ چې "د باور رامنځته کولو لپاره لا اوږده لاره پاتې ده."

هغه خبرداری ورکړ چې که واشنګټن د ایران پر خاوره برید وکړي، نو ایران "به په سیمه کې د دوی (امریکایانو) پر اډو برید وکړي."

هغه وویل چې په مسقط کې خبرې "غیر مستقیمې" وې، د عماني منځګړو له لارې، خو ویې ویل چې د امریکا له پلاوي سره د لاس ورکولو "یو فرصت" موجود و.

عراقچي وویل، دواړو خواوو هوکړه کړې چې د خبرو بل پړاو "ډېر ژر" ترسره کړي، خو نېټه یې لا نه ده ټاکل شوې.

هغه وویل چې د ایران توغندیز پروګرام "هیڅکله د خبرو وړ نه دی" ځکه چې دا د "دفاعي مسلې" سره تړاو لري.

متحده ایالاتو هڅه کړې چې د ایران د بالستیک توغندیو پروګرام او په سیمه کې له وسله والو ډلو څخه د هغه ملاتړ ته هم پاملرنه وکړي — هغه مسایل چې د رسنیو د راپورونو له مخې اسرائیلو د خبرو اترو د شاملولو لپاره فشار راوړی دی.