تورن جنرال وجیه علي العبدالله د اسد په واکمنۍ کې ۱۳ کاله په ولسمشرۍ ماڼۍ کې د پوځي چارو د رئیس په توګه دنده ترسره کړې وه.
د سوریې چارواکو د شنبې په ورځ د د بشارلاسد د یوه مهم همکار او لوړپوړي جنرال د نیولو خبر ورکړ، چې د اسد د دورې پر مهال په شویو سرغړونو کې په لاس لرلو تورن دی.
کورنیو چارو وزارت پر 'اېکس' ټولنیزه شبکه لیکلي چې امنیتي ځواکونو د ترهګرۍ ضد ریاست په همغږۍ په یوه 'چټک امنیتي عملیات' کې تورن جنرال وجیه علي العبدالله نیولی دی.
د وزارت په وینا، العبدالله د ګوښه شوي ولسمشر بشارالاسد په واکمنۍ کې ۱۳ کاله په ولسمشرۍ ماڼۍ کې د پوځي چارو د رئیس په توګه دنده ترسره کړې ده.
په اعلامیه کې العبدالله 'د پخواني رژیم د نږدې کړۍ یو له ستنو' څخه بلل شوی او تور لګول شوی چې د خپلې دندې پر مهال یې د سوریې د ملکي وګړو پر وړاندې 'ځپونکي اقدامات او سختې سرغړونې' همغږې کړي دي.
څېړنو ښودلې چې العبدالله دا چوکۍ د ۲۰۰۵ او ۲۰۱۸ کلونو ترمنځ په غاړه لرله، هغه دوره چې وزارت د سوریې په وروستي تاریخ کې تر ټولو خونړۍ بللې ده.
دا نیونه د هغو عملیاتو یوه برخه ده چې د سوریې پخواني پوځي او امنیتي چارواکي په نښه کوي، کوم چې د سوریې د انقلاب پر مهال په سرغړونو کې په لاس لرلو تورن دي.
د جمعې په ورځ، سوریې چارواکو جنرال خردل احمد دیوب ونیو، چې د دمشق ته نږدې په ختیځه غوطه کې په کیمیاوي برید کې په لاس لرلو تورن دی.
دا نیونه څو ورځې وروسته له هغه وشوه چې چارواکو امجد یوسف ونیو، چې په ۲۰۱۳ کال کې یې د دمشق په تضامن سیمه کې د عام وژنې په ترسره کولو تورن دی.
اسد، چې نږدې ۲۵ کاله یې پر سوریې واکمني وکړه، د ۲۰۲۴ کال د ډسمبر په اتمه روسیې ته وتښتېد، چې په دې سره د بعث ګوند لسیزې اوږده واکمني پای ته ورسېده، کومه چې په ۱۹۶۳ کال کې پیل شوې وه. د ۲۰۲۵ کال په جنوري کې د ولسمشر احمد الشرع په مشرۍ یوه انتقالي اداره جوړه شوه.
