د ناټو د دولتونو او حکومتونو د مشرانو ۳۶مې سرمشریزې ته چې کوربه توب یې انقره کوي، یوازې څو ساعته پاتې دي. د امریکا متحده ایالاتو ولسمشر ډونالډ ټرمپ به سبا انقرې ته راشي. سپینې ماڼۍ د ټرمپ د سفر پروګرام اعلان کړ.
د امریکا د متحده ایالاتو ولسمشر ډونالډ ټرمپ به سبا ماسپښین انقرې ته ورسېږي او د ولسمشر رجب طیب اردوغان لخوا به یې په رسمي مراسمو سره هرکلی وشي.

ټرمپ به د دولتي هرکلي په مراسمو او د اعزازي ګارډ (شرف قطعې) له معاینې وروسته، له ولسمشر اردوغان سره دوه اړخیزه لیدنه ترسره کړي.

د چهارشنبې په ورځ به ټرمپ د ناټو په رسمي هرکلي او د یادګاري ډله ییز عکس له مراسمو وروسته، د ناټو د مشرانو په کاري غونډه کې ګډون وکړي.

د امریکا ولسمشر به د چهارشنبې په ورځ ماسپښین د اوکراین له ولسمشر ولادیمیر زیلینسکي او د سوریې له ولسمشر احمد الشرع سره هم دوه اړخیزې لیدنې ولري.

ټرمپ به په همدې ورځ له انقرې څخه تر روانېدو وړاندې یو مطبوعاتي کنفرانس هم جوړ کړي.