د تورکیې ولسمشر رجب طیب اردوغان د چهارشنبې په ورځ په استانبول کې د ۱۲ کلن برېتانوي فعال جوشوا هریس کوربه توب وکړ چې په اوټېزم اخته دی. هریس د انګلستان په "پیټربورو" ښار کې پر یوه جومات د افراطي ښي اړخو له برید وروسته، د "د نفرت پر ځای کیک " په نوم کمپاین پیل کړ او د اسلاموفوبیا پر وړاندې د پیوستون ښودلو په موخه یې په کور کې جوړ شوي کیکونه پاخه او پر لمونځ کوونکو وویشل.
سره له دې چې له ګواښونو سره مخ وو، جوشوا او د هغه پلار ډان هریس دغه لړۍ پراخه کړه او په ټوله بریتانیا کې یې له ۱۰۰ څخه د زیاتو جوماتونو لیدنه وکړه. دوی په استانبول کې د خپل لس ورځني سفر پر مهال هم، د دوستۍ او یووالي د پیاوړتیا او د مسلمانانو ضد کرکې په وړاندې د درېدو په هدف، د تاریخي "سلیمانيه" جومات په ګډون په بېلابېلو جوماتونو کې د کورنیو کیکونو په ویشلو خپل دغه کمپاین جاري ساتلی دی.