روبیو : لاوروف ته مو د اوکراین جګړې د حل په برخه کې د پرمختګ د نشتوالي په اړه خپل خفګان څرګند کړ

د امریکا د بهرنیو چارو وزیر مارکو روبیو وویل چې هغه خپل روس سیال ته د اوکراین جګړې د حل په برخه کې د پرمختګ د نشتوالي په اړه خپله "مایوسي او غوسه" څرګنده کړه.

روبیو د پنجشنبې په ورځ د مالیزیا په آسيان غونډه کې د سرګي لاوروف سره د لیدنې وروسته خبریالانو ته وویل: "ما د ولسمشر (ډونالډ ټرمپ) خبرې تکرار کړې، چې هم ناامیدي او هم خفګان د پرمختګ د نشتوالي په اړه څرګندوي." دا د دوی دویم مخامخ ملاقات و، په داسې حال کې چې ټرمپ د اوکراین جګړې د اوږدېدو له امله د روسیې ولسمشر ولادیمیر پوتین څخه زیات خفه شوی دی.

د پنجشنبې په ورځ روسیې د ډرونونو او توغنديو سره  د اوکراین پر پلازمېنه بریدونه وکړل، ځکه چې د روسیې زیاتېدونکي بریدونه د اوکراین هوايي دفاعي سیستمونه تر فشار لاندې راوستي، او زرګونه خلک یې د شپې په پناه ځایونو کې پاتې کېدو ته اړ کړي دي.

د اوکراین ولسمشر ولادیمیر زیلینسکي وویل چې روسیې ۱۸ توغندي او شاوخوا ۴۰۰ ډرونونه په داسې برید کې توغولي چې په ځانګړي ډول یې د کیف ښار په نښه کړی و.

مسکو هیڅ تبصره ونه کړه، مګر تیره شپه یې د خپل ګاونډي په وړاندې د ۷۲۸ ډرونونو د ریکارډ برید نه  خبر ورکړ.

د سه شنبې په ورځ، اوکراین ته د امریکا دفاعي وسلو د بیا استولو د امر کولو یوه ورځ وروسته، ټرمپ په غیر معمولي ډول نیوکه وکړه او ویې ویل چې د سولې په اړه د پوتین څرګندونې "بې معنا" دي.

ټرمپ همدارنګه ویلي چې هغه داسې قانون ملاتړ په پام کې لري چې پر روسیه سخت بندیزونه ولګوي، په شمول د هغو هېوادونو لپاره ۵۰۰ سلنه تعرفې چې د روسیې نفت، ګاز، یورانیم یا نور صادرات اخلي.

روبیو او لاوروف په فبرورۍ کې په سعودي عربستان کې د ټرمپ د هڅو په ترڅ کې د اړیکو د بیا رغولو او د جګړې د پای ته رسولو لپاره لومړی ملاقات کړی و.

کرملین د چهارشنبې په ورځ وویل چې د ټرمپ د نیوکو په اړه آرامه دی او هڅه به وکړي چې له واشنګټن سره "ماتې شوې" اړیکې سمې کړي.

د چهارشنبې په ورځ په روم کې د اوکراین دوستانه هېوادونو په یوه کنفرانس کې، د ټرمپ د اوکراین استازي کیت کیلګ د زیلینسکي سره وکتل.

"