د هند پوځ ویلي دي، د هند او پاکستان د پوځي عملیاتو د مشرانو ترمنځ خبرې ځنډېدلې دي او اوس ټاکل شوې چې د دوشنبې په ماښام ترسره شي.
د هند د پوځ یوه لوړپوړي چارواکي وویل، د یکشنبې په ورځ، د هند پوځ پاکستان ته د "هاټلاین" پیغام واستاوه چې د تېرې ورځې د اوربند د سرغړونو په اړه یې خبر ورکړ، او د نوي ډیلي د دې اراده یې څرګنده کړه چې که دا ډول پېښې بیا تکرار شي، نو ځواب به ورکړي.
د پاکستان د پوځ ویاند بیا د هر ډول سرغړونو ادعاوې رد کړې دي.
تاوتریخوالی زیات شوی دی.
دواړو سیالانو د یو بل پوځي تاسیسات د توغندیو او ډرونونو په وسیله په نښه کړي، چې په پایله کې یې ګڼ شمېر ملکي وګړي وژل شوي دي. اړیکې هغه وخت خرابې شوې کله چې هند پاکستان د یوه برید په تور تورن کړ چې ۲۶ سیلانیان یې وژلي وو.
پاکستان دغه تورونه رد کړي او د یوې بې طرفه پلټنې غوښتنه یې کړې ده.
هند ویلي چې د چهارشنبې په ورځ یې په پاکستان او د پاکستان تر ادارې لاندې کشمیر کې د نهو "ترهګریزو بنسټونو" پر ځایونو بریدونه کړي دي، خو اسلامآباد ویلي چې دا ملکي ځایونه وو.
په داسې حال کې چې اسلامآباد د اوربند د اسانتیا لپاره له واشنګټن څخه مننه کړې او د ټرمپ هغه وړاندیز ته یې هرکلی کړی چې د هند تر ادارې لاندې د کشمیر په شخړه کې منځګړیتوب وکړي، نوې ډیلي د امریکا د ښکېلتیا یا په یو بې طرفه ځای کې د خبرو په اړه څه نه دي ویلي.
