د یوې رسمي اعلامیې له مخې، د تورکیې ولسمشر رجب طیب اردوغان به د یکشنبې په ورځ د ملګرو ملتونو د عمومي اسمبلۍ د لوړې کچې په اونۍ کې د ګډون لپاره نیویارک ته خپل څلور ورځنی سفر پیل کړي.
د تورکیې د ولسمشرۍ ماڼۍ د اړیکو رئیس برهان الدین دوران د شنبې په ورځ وویل، ټاکل شوې ده چې اردوغان به د سې شنبې په ورځ، چې د لوړې کچې عمومي بحثونو د پرانیستې ورځ ده، ۸۱مې عمومي اسمبلۍ ته وینا وکړي.
د سږ کال غونډه د «بیا د باور جوړول، د بدلون مدیریت: هغه ملګري ملتونه چې د ټولو لپاره کار کوي» تر شعار لاندې جوړیږي.
تمه کېږي چې د دغه سفر پر مهال به اردوغان د ملګرو ملتونو له سرمنشي انتونیو ګوتریش او د بېلابېلو هېوادونو له ولسمشرانو او د لومړي وزیرانو سره دوه اړخیزې لیدنې هم ولري.
همداراز تمه کیږي چې ولسمشر به په متحده ایالاتو کې په هغو یو لړ غونډو کې هم برخه واخلي چې پکې په دغه هېواد کې د مېشتو ترکي اتباعو استازي، د تورکیې-امریکا سوداګریزې کړۍ، او څېړنیز بنسټونه ګډون لري.
دا سفر په داسې حال کې ترسره کېږي چې د نړۍ مشران په نیویارک کې د ملګرو ملتونو د کلنۍ عمومي اسمبلۍ لپاره راټولیږي، چې د نړیوالو ډیپلوماتیکو خبرو اترو لپاره یو له مهمو مرکزونو څخه ګڼل کېږي.
