د ناروې د کډوالو شورا (NRC) د چهارشنبې په ورځ وویل چې په روانه اونۍ کې په کابل کې د روږدو کسانو د درملنې پر یو کلینیک د پاکستان په هوايي برید کې په سلګونو کسان وژل شوي او ټپیان شوي دي؛ دا د دغې درنې مرګ‌ژوبلې لومړی خپلواک تایید دی.

پاکستاني ځواکونو د دوشنبې په ورځ پر کابل او ختیځ سرحدي ولایت ننګرهار بریدونه وکړل او ادعا یې وکړه چې "پوځي تاسیسات" او د "ترهګرو ملاتړې زیربناوې" یې په نښه کړې دي.

خو د افغانستان په  پلازمېنه کابل کې طالب چارواکو د سې شنبې په ورځ وویل چې په کابل کې د روږدو کسانو د درملنې په یو مرکز کې نږدې ۴۰۰ کسان وژل شوي او تر ۲۰۰ ډېر نور ټپیان شوي دي.

په افغانستان کې د یادې شورا (NRC) مشر جاکوپو کاریدي وویل چې د دوی ټیمونه د بریدونو له پیل سمدستي وروسته د ژغورنې په عملیاتو کې د مرستې لپاره سیمې ته تللي وو. هغه فرانس پریس خبري اژانس (AFP) ته وویل: "هغه څه چې موږ ولیدل او له هغو خلکو سره مو چې د بېړنیو مرستو په برخه کې بوخت وو خبرې وکړې، موږ ویلی شو چې په سلګونو کسان مړه او ټپیان شوي دي."

په افغانستان کې د مرګ‌ژوبلې د کره شمېرې سمدستي او خپلواک تایید ستونزمن دی، ځکه چې بریدونه ډېری وخت په سختو سیمو کې ترسره کېږي او د چارواکو لخوا ضد او نقیض معلومات ورکول کېږي.

پاکستان، چې پر افغانستان تور پورې کوي چې هغو وسله والو ته یې پناه ورکړې چې پر خاوره یې بریدونه کوي، ویلي چې د طالبانو د حکومت دا ادعاوې چې ګواکې کلینیک په نښه شوی "بشپړې بې بنسټه" دي.

کاریدي تایید کړه چې په کابل کې روغتیایي مرکز ویشتل شوی او یوه ودانۍ یې "په بشپړه توګه سوځېدلې او ویجاړه شوې ده." هغه زیاته کړه چې د ژغورنې ټیمونو د سې شنبې په سهار لا هم هڅه کوله چې له ویجاړیو څخه مړي وباسي او د کمپلیکس هغو برخو ته لاره ومومي چې دېوالونه یې نړېدلي وو.

هغه دا صحنه، چې په کې د انسانانو د بدن غړي هم تر سترګو کېدل، "ټکان ورکوونکې" وبلله او ویې ویل چې د قربانیانو پېژندنه او د مړو د کره شمېرې په ګوته کول لا هم ستونزمن دي.

هغه زیاته کړه: "په اروپا کې موږ د خلکو د پېژندنې لپاره داسې سیسټمونه لرو چې حتی د بدن له غړو یې پېژندلی شي، مګر دلته زه نه پوهېږم چې دوی دغه سیسټمونه لري که نه. خو هغه څه چې ما ولیدل؛ په یو ځای کې ګوته وه، په بل ځای کې پښه او په بل ځای کې لاس؛ دا واقعیا وحشتناکه وه."