افغانستان د پنجشنبې په ورځ وویل چې له پاکستان سره په تازه نښتو کې څلور ملکي وګړي وژل شوي دي. له دې سره د پولې دواړو غاړو ته د وژل شویو سرتېرو او ملکي وګړو رسمي شمېر لږ تر لږه ۹۵ ته ورسېد.
د افغان حکومت مرستیال ویاند حمدالله فطرت د امریکایي ټولنیزې رسنۍ 'ایکس' له لارې ویلي چې دا مرګ ژوبله په سوېل ختیځ ولایت خوست کې رامنځته شوې ده.
اسلام اباد تر اوسه په دې اړه سمدستي غبرګون نه دی ښودلی، خو د فبرورۍ له وروستیو راهیسې یې د پولې په اوږدو کې د "غضب لالحق" په نوم خپل عملیات جاري ساتلي دي.
د ملګرو ملتونو د معلوماتو له مخې، د فبرورۍ له ۲۶مې څخه د مارچ تر ۵مې پورې په افغانستان کې د توپخانې د ډزو او هوایي بریدونو له امله د ۵۶ وژل شویو په ګډون، ۱۸۵ ملکي وګړو ته مرګ ژوبله اوښتې ده.
خو د کابل او اسلام اباد لخوا په شریک شویو رسمي ارقامو کې ښکاري چې د مړو شمېر ۹۵ ته لوړ شوی دی. په دې کې په پاکستان کې ۱۳ سرتېري او یو ملکي وګړی، او په افغانستان کې ۱۳ سرتېري او ۶۸ ملکي وګړي شامل دي.
په وروستیو اونیو کې د افغانستان او پاکستان اړیکې ترینګلې شوې دي. تېره میاشت پر ډیورنډ کرښه یو ځل بیا تاوتریخوالی زیات شو چې په پایله کې یې دواړو لورو ته ځاني او مالي زیانونه واوښتل.
پاکستان ادعا کوي چې افغانستان هغو ترهګرو ته خوندي پناوځایونه ورکړي چې پر دغه هېواد بریدونه کوي، خو کابل دا تورونه په کلکه ردوي.
اسلام اباد ادعا کړې چې ۵۸۳ افغان طالبان او وسله وال یې وژلي دي، په داسې حال کې چې کابل بیا د ۵۵ پاکستاني سرتېرو د وژلو ادعا کوي؛ خو دا دواړه ادعاوې په خپلواک ډول نه دي تایید شوې.
