په افغانستان باندې د پاکستان په بریدونو کې ۷۶۱ تنه وژل شوي او ۶۳۱ تنه نور ټپیان شوي دي
فطرت ویلي چې د پاکستان په بریدونو کې ۷۶۱ کسانو خپل ژوند له لاسه ورکړی، ۶۲۱ کسان ټپیان شوي او ۲۷ زره او ۴۰۷ کورنۍ له خپلو مېنو بې ځایه شوې دي.
د افغانستان د حکومت د ویاند مرستیال حمدالله فطرت د ایکس (پخواني ټویټر) له لارې په دې اړه معلومات شریک کړي دي.
فطرت ویلي چې د پاکستان په بریدونو کې ۷۶۱ کسانو خپل ژوند له لاسه ورکړی، ۶۲۱ کسان ټپیان شوي او ۲۷ زره او ۴۰۷ کورنۍ له خپلو مېنو بې ځایه شوې دي.
د پاکستان د معلوماتو او خپرونو وزیر عطاالله تارړ په ایکس پاڼه کې په خپره کړې اعلامیه کې ویلي چې په دغو نښتو کې د افغانستان لوري ته ۷۹۶ وسله وال وژل شوي او تر ۱۰۴۳ ډېر نور ټپیان شوي دي.
تارړ زیاته کړې چې په افغانستان کې ۲۸۶ امنیتي پوستې او ۲۴۹ ټانکونه، زغروال ګاډي او توپخانې له منځه وړل شوې او ۴۴ پوستې د دوی ځواکونو نیولې دي. هغه وویل چې په افغانستان کې دننه ۸۱ "ترهګریزې موخې او د ترهګرو ملاتړې زیربناوې" په هوايي بریدونو کې په نښه شوې دي.
نوموړي دغه راز ویلي چې په خیبر پښتونخوا ایالت کې په شوې نښته کې ۳۷ وسله وال وژل شوي او تر ۸۰ ډېر نور ټپیان شوي دي.
د اپرېل په دویمه نېټه، پاکستان خبر ورکړ چې له افغانستان سره په چین کې د روانو جګړو د پای ته رسولو په موخه خبرې اترې روانې دي او افغانستان هم تایید کړه چې دغه هېواد ته یې یو پلاوی استولی دی.
- د پاکستان او افغانستان ترمنځ جګړه
د فبرورۍ په ۲۲مه، پاکستان په خپل هېواد کې د پاکستاني طالبانو (TTP) د وروستیو بمي بریدونو په غبرګون کې، د افغانستان په سرحدي کرښه کې ۷ هغه ځایونه په نښه کړل چې د دوی په وینا "ترهګریز کمپونه" وو.
د افغانستان حکومت هم د فبرورۍ په ۲۶مه د فرضي کرښې په اوږدو کې د اسلام اباد پر پوځي تاسیساتو بریدونه وکړل. پاکستان د دغو بریدونو په ځواب کې په کابل او سرحدي سیمو کې د ځینو نورو اهدافو په ویشتلو پیل وکړ.
پاکستان او افغانستان د ۲۰۲۵ کال په اکتوبر کې هم ورته کړکېچ تجربه کړی و. دواړو خواوو د ۲۰۲۵ کال په نوامبر کې د اوربند د جزییاتو په اړه په استانبول کې ناسته وکړه، خو دا خبرې اترې بې پایلې پاتې شوې او وځنډول شوې.
اسلام اباد ادعا کوي چې ټي ټي پي (TTP) په افغانستان کې پټنځایونه لري او خپل بریدونه له هغه ځایه تنظیموي، خو د افغانستان حکومت دا تورونه په کلکه ردوي.