دواړو مشرانو پر دوه اړخیزو اړیکو، په سیمه کې پر روانو نښتو او همدارنګه پر سیمه ییزو او نړیوالو مسایلو خبرې وکړې.

د تورکیې د عامه اړیکو ریاست په یوه اعلامیه کې ویلي، چې ولسمشر رجب طیب اردوغان د پنجشنبې په ورځ له خپل فرانسوي سیال ایمانویل مکرون سره په ټیلیفوني خبرو کې، د سیمه ییزو او نړیوالو نښتو په پام کې نیولو سره د ناټو د متحدینو ترمنځ د دفاعي همکاریو د زیاتوالي پر اړتیا ټینګار وکړ.

دواړو مشرانو پر دوه اړخیزو اړیکو، په سیمه کې پر شته نښتو او همدارنګه پر سیمه ییزو او نړیوالو مسایلو خبرې وکړې.

اردوغان مکرون ته وویل چې په سیمه او نړۍ کې روانې جګړې "د ناټو د متحدینو ترمنځ د دفاعي همکاریو زیاتوالی اړینوي."

هغه ټینګار وکړ چې "په دفاعي صنعت کې د هغو ګډو ګامونو چټکول اړین دي چې له ډېرې مودې راهیسې ځنډېدلي دي."

اردوغان وویل، په ایران کې د کړکېچ اوږدېدل به "هم د سیمې او هم د نړۍ لپاره د بې ثباتۍ سرچینه وي" او تورکیه "د ډیپلوماټیکې فضا د پیاوړتیا او خبرو اترو ته د بېرته ستنېدو لپاره جدي هڅې کوي."

هغه زیاته کړه چې انقره په ایران کې وروستي تحولات له نږدې څاري، او "د ملکي وګړو پر مړینې خواشینې او د هغوی د شمېر د زیاتوالي په اړه اندېښمنه ده."