د افغانستان په شمال کې د ریښتر په کچه د ۶.۳ درجې په شدت سره د زلزلې وروسته د ژغورنې او پلټنې چارې بشپړ او د پاکارۍ چارې پیل شوې. د ویلو ده چې پدې زلزله کې د ۲۰ تنو د وژل کیدو او سلګونو تنو د ټپي کیدو نه خبر ورکړی شوی دی.
چارواکي وايي، زلزله د افغانستان شمالي ښار مزارشریف ته نږدې شوې، چې لږ تر لږه ۲۰ کسان یې وژلي او د ښار تاریخي د حضرت علي کرم الله وجهه روضې ته زیان اړولی دی.
د چارواکو په وینا، دغې زلزلې د دوشنبې په ورځ د افغانستان شمالي ښار مزارشریف او شاوخوا ولایتونه ولړزاول ، چې له امله يي لږ تر لږه ۲۰ تنو ژوند د لاسه ورکړی دی او په سلګونو تنو ټپیان شوي دي.
په افغانستان کې د ملګرو ملتونو د بشري چارو د همغږۍ دفتر د وروستیو شمېرو له مخې، شاوخوا ۹۴۵ کسان ټپیان شوي دي.
د طبیعي پېښو پر وړاندې د مبارزې ملي ادارې په وینا، سلګونه کورونه په بشپړه یا قسمي توګه ویجاړ شوي، چې مرستندویه ډلو ویلي دا شمیره د ژمي په درشل کې د اندیښنې وړ ده، چیرې چې د تودوخې درجه له صفر څخه ښکته کیږي.
د سې شنبې په ورځ، د زلزلې مرکز ته نږدې سیمه، تنګي تاشقرغان کې، اوسیدونکو د کنډوالو په پاکولو او د زیانمنو شویو ودانیو په پیاوړي کولو بوخت وو.
یو ځايي هټیوال، محمد یاسین وویل، په زلزله کې لسګونه ودانۍ زیانمنې یا ویجاړې شوې دي.
هغه وویل: "که تاسو د دوکانونو دننه لاړ شئ، نو ویره احساسوئ چې هره لحظه، شاید همدا اوس یا په لسو دقیقو کې، ونړیږي."
دا ناورین د افغانستان د طالبانو ادارې لپاره وروستۍ ننګونه ده، چې لا دمخه د نورو بحرانونو سره لاس او ګریوان ده، لکه د اګست میاشتې زلزله چې د هیواد په ختیځ کې یې زرګونه کسان ووژل، د بهرنیو مرستو کمښت، او د ګاونډیو هیوادونو لخوا د افغان کډوالو ډله ایز ایستل.
ملګرو ملتونو د مرستې ژمنه کړې، او همدارنګه هند، چې هڅه کوي په افغانستان کې د طالبانو له لنډمهاله ادارې سره اړیکې ښې کړي، کومه چې لاهم د ډیری لویدیځو هیوادونو تر بندیزونو لاندې ده. چین هم د سې شنبې په ورځ وویل چې مرسته به وکړي.
افغانستان، چې د لوړو غرونو په منځ کې پروت دی، د یو لړ طبیعي پیښو سره مخ دی، خو زلزلې یې تر ټولو ډیر تلفات لري، چې هر کال په اوسط ډول شاوخوا ۵۶۰ کسان وژني او د ۸۰ میلیونه ډالرو په ارزښت کلنی زیان اړوي. د ودانیو ټیټ کیفیت هم د مرګ ژوبلې په شمیر کې رول لري، او کارپوهان سپارښتنه کوي چې نوې ودانۍ باید د زلزلې په وړاندې مقاومت لرونکي جوړې شي او موجوده ودانۍ باید ترمیم شي ترڅو د نړیدو چانس کم شي.
