تورکیې او هنګري د ستراتیژیک شراکت د پیاوړتیا لپاره د امنیت او کلتور په برخو کې تړونونه لاسلیک کړل
د تورکیې ولسمشر اردوغان په استانبول کې په یوه ګډ خبري کنفرانس کې وویل چې انقره او بوداپست د ۶ میلیارده ډالرو سوداګریز حجم هدف ته نږدې دي.
د تورکیې ولسمشر وویل، تورکیې او هنګري د دوه اړخیزو اړیکو د پیاوړتیا په موخه د هوايي چلند، امنیت، ټکنالوژۍ، کلتور او زده کړو په ګډون په ډېرو برخو کې تړونونه لاسلیک کړي دي.
د تورکیې ولسمشر رجب طیب اردوغان د دوشنبې په ورځ په استانبول کې د هنګري له لومړي وزیر ویکتور اوربان سره په یوه ګډ خبري کنفرانس کې وویل چې دواړه هېوادونه د ۶ میلیارده ډالرو سوداګریز حجم هدف ته نږدې شوي دي.
اردوغان زیاته کړه: "موږ په ۲۰۲۵ کال کې، چې د تورکیې او هنګري د ساینس او نوښت کال اعلان شوی، ۲۸ ګډ اقدامات ترسره کړل او ګډو پروژو ته مو سرچینې ځانګړې کړې."
'تورکي نړۍ به لویه انرژي راټوله کړي'
اوربان هم د تورکیې سیمه ییز رول او د اردوغان ډیپلوماتیکې هڅې وستایلې او ویې ویل چې ترکي نړۍ د یوه خوځنده او پیاوړي ځواک په توګه راڅرګندېږي.
هغه وویل، اردوغان ورته ویلي چې یوه بېله نړۍ راروانه ده او ترکي نړۍ به لویه انرژي راټوله کړي، او دا چې هغه د "ترکي پېړۍ" تر مفکورې لاندې یو لوی لید لیدلی دی.
د هنګري لومړي وزیر د روسیې او اوکراین د جګړې د پای ته رسولو لپاره د تورکیې هڅې هم وستایلې او اردوغان یې په دې بهیر کې "یوازینی بریالی منځګړی" وباله.
دا خبري کنفرانس د مشرانو له لیدنې وروسته ترسره شو. اوربان تورکیې ته د تورکیې او هنګري د لوړې کچې ستراتیژیکو همکاریو شورا په اوومه غونډه کې د ګډون لپاره په سفر تللی دی.
