یوه کس د فرانسې په یوه جومات کې د قرآن کریم نسخې څیرې کړې
د پاریس لوی جومات پر دې برید "ژوره خواشیني" څرګنده کړې او دا یې د مسلمانانو پر وړاندې د کرکې یو "نه منلو وړ" عمل بللی دی.
چارواکو او د پاریس لوی جومات ویلي، چې یوه کس د فرانسې په مرکزي ښار کلرمونټ-فرانډ (Clermont-Ferrand) کې په زوره یوه جومات ته ننوتلی، د قرآن کریم نسخې یې څیرې کړي، جومات ته یې زیان اړولی او د لمونځ کوونکو پر وړاندې یې ګواښونه کړي دي.
د پاریس لوی جومات پر اېکس شبکه په یوه اعلامیه کې پر دې برید خپله "ژوره خواشیني" څرګنده کړې او دا یې د مسلمانانو پر وړاندې د کرکې یو "نه منلو وړ" عمل بللی دی.
دغه جومات له فرانسوي چارواکو غوښتي چې د عامل پر وړاندې کلک اقدامات وکړي او په ټول هېواد کې یې د اسلام ضد کړنو د مخ پر زیاتېدونکې څپې په اړه خبرداری ورکړی دی.
چارواکو د پېښې په اړه پلټنې پیل کړې دي او د عامل د نیولو هڅه کوي.
