د پولنډ د «PAP» خبري اژانس د راپور له مخې، روټه د پولنډ پلازمېنې وارسا ته د خپل سفر په ترڅ کې خبریالانو ته وویل، چې د دغه هېواد د هوايي حریم د نقضېدو د پېښې څرنګوالی لا تر اوسه په بشپړه توګه نه دی روښانه شوی او په دې اړه پلټنې روانې دي.
روټه د هوايي حریم نقضېدل «خطرناک» عمل وباله او زیاته یې کړه چې له پولنډي مشرانو سره په دوامداره اړیکه کې دی.
نوموړي پولنډ د ناټو یو پیاوړی متحد وباله او ویې ویل چې دا هېواد غوره پوځي ځواکونه لري؛ هغه ټینګار وکړ چې دا پېښه باید له هر اړخه روښانه شي.
روټه څرګنده کړه چې په اروپا کې د ناټو د متحدو ځواکونو ستر قوماندان الیکسوس ګرینکېویچ به د هغو عناصرو د پېژندلو لپاره اړین اقدامات ترسره کړي چې دفاعي او مخنیونکي سیسټمونه ګواښي، او د اړتیا په صورت کې به اړین بدلونونه هم راولي.
د ناټو سرمنشي د دې پوښتنې په ځواب کې چې آیا په راتلونکي کې به هم د پولنډ هوايي حریم ورته نقض شي او که نه، وویل چې په دې اړه پرېکنده ځواب نه شي ورکولی، خو ټینګار یې وکړ: «ناټو به د پولنډ د خاورې له هر سانتي متر څخه دفاع وکړي.»
هغه په پولنډ کې د امریکا د پوځي اډو د شمېر د زیاتېدو د احتمال په اړه د یوې پوښتنې په ځواب کې وویل چې دا د پولنډ او متحده ایالاتو ترمنځ خپلمنځي موضوع ده.
روټه زیاته کړه چې امریکا په اروپا کې د خپلو ټولو پوځي ځواکونو پر ځای پر ځای کېدو له سره کتنه کوي او په دې اړه د ځینو معلوماتو شریکول له عامه افکارو سره ممکن نه دي.
د پولنډ د هوايي حریم نقضېدل
پر اوکراین د روسیې د بریدونو پر مهال، د نومبر په ۲۰مه اعلان وشو چې درې توکي د پولنډ هوايي حریم ته داخل شوي او د دغه هېواد پر خاوره راغورځېدلي دي، چې له ډلې یې یو د «Kh-101» ډوله روسي کروز توغندی پېژندل شوی دی.
د ناټو سرمنشي مارک روټه د پولنډ د هوايي حریم نقضېدل «خطرناک» بللي وو او ویلي یې وو چې له دې پېښې وروسته د ناټو جنګي الوتکو الوتنې کړې او متحدین به خپلې دفاعي او مخنیونکې وړتیاوې لا پیاوړې کړي.
د پولنډ لومړي وزیر ډونالډ ټوسک هم ویلي وو چې دوی په بشپړ ډاډ سره پوهېږي چې د دوی هوايي حریم ته داخل شوي او پر خاوره یې راغورځېدلي درې واړه توکي د روسیې اړوند دي، او دا پېښه کېدای شي یو قصدي پاروونکی عمل وي.















