د سعودي په مشرۍ ایتلاف د بېلتون غوښتونکي مشر سره د کړکېچ په ترڅ کې د یمن په جنوب بریدونه کړي دي

په الضالع کې لږ تر لږه څلور کسان ووژل شول، په داسې حال کې چې ایتلاف د  بیلتون غوښتونکي مشر د ځواکونو په راټولولو او په ریاض کې له خبرو اترو په ډډه کولو تورن کړ.

د فرانس پریس خبري اژانس ته دوو روغتيايي سرچينو ویلي، چې په يمن کې د سعودي په مشرۍ ايتلاف په بريدونو کې لږ تر لږه څلور کسان وژل شوي دي. دا بریدونه وروسته له هغه وشول چې ایتلاف د بېلتون غوښتونکې جنوبي انتقالي شورا مشر، عیدروس الزبیدي، سعودي عربستان ته د یوې ټاکل شوې الوتنې څخه په ډډه کولو تورن کړ.

په الضالع کې د النصر او التضامن روغتونونو طبي سرچینو AFP ته وویل: "په الضالع ولایت باندې په بریدونو کې لومړنۍ مرګ ژوبله د څلورو ملکي وګړو وژل کېدل او شپږ تنه ټپیان دي."

د ایتلاف ویاند، تورن جنرال ترکي المالکي، د چهارشنبې په سهار په یوه بیان کې وویل: "د مشروع حکومت او د ملي ډال ځواکونو سره له همغږۍ وروسته، ایتلافي ځواکونو د سهار په (۴:۰۰) بجو یو محدود مخنیوی برید ترسره کړ ترڅو هغه ځواکونه غیر فعال کړي او هغه څه شنډ کړي چې عیدروس الزبیدي یې د ترسره کولو هوډ درلود."

د بیان له مخې، الزبیدي ته د یکشنبې په ورځ لارښوونه شوې وه چې په ۴۸ ساعتونو کې سعودي عربستان ته سفر وکړي ترڅو د ولسمشرۍ د مشرتابه شورا له رییس رشاد العلیمي او د ایتلاف له چارواکو سره په حضرموت او المهره کې د بېلتون غوښتونکې جنوبي انتقالي شورا پورې تړلو ځواکونو د بریدونو په اړه خبرې وکړي.

الزبیدي وروسته اشاره وکړه چې هغه به د سې شنبې په ورځ په خبرو کې ګډون وکړي، خو له عدن څخه د یمن هوایي شرکت په الوتکه کې له سپریدو پاتې شو وروسته له هغې چې الوتنه څو ساعته وځنډول شوه.

المالکي وویل: "په دې وخت کې، مشروع حکومت او ایتلاف ته معلومات ورسیدل چې عیدروس الزبیدي یو لوی پوځي ځواک، د زغره والو او جنګي وسایطو، درنو او سپکو وسلو او مهماتو په ګډون، راټول کړی دی."

د متحده عربي اماراتو ملاتړې جنوبي انتقالي شورا، چې د پخواني خپلواک جنوبي یمن د بیا راژوندي کولو په لټه کې ده، په وروستیو اونیو کې د هیواد په پراخو برخو کې پرمختګ کړی، او حکومتي ځواکونه او د هغوی متحدین یې شړلي دي.

وروسته له هغه چې د بېلتون غوښتونکې جنوبي انتقالي شورا د دسمبر په میاشت کې له حکومتي ځواکونو سره له نښتو وروسته د حضرموت او المهره ولایتونو کنټرول ترلاسه کړ، تاوتریخوالی زیات شو.

د یمن د ولسمشرۍ د مشرتابه شورا حکومت د مختلفو ډلو یوه مجموعه ده چې د STC غړي هم پکې شامل دي او تر ډېره د ایران پلوه حوثیانو سره د ګډ مخالفت له امله سره یو ځای پاتې دي.

حوثیانو په ۲۰۱۴ کال کې د یمن پلازمېنه صنعا ونیوله، حکومت یې له واکه لرې کړ او د هیواد په ډېری شمالي برخو یې خپل کنټرول ټینګ کړ.

په وروستیو کلونو کې د یمن پر سر د سعودي عربستان او متحده عربي اماراتو ترمنځ وخت په وخت تاوتریخوالی راپورته شوی، ریاض د یمن د ځمکنۍ بشپړتیا ملاتړ کوي پداسې حال کې چې ابوظبي د جنوبي ډلو، د STC په ګډون، ملاتړ کړی، چې په ټول جنوب کې د تکراري ځواکمنو مبارزو او کله ناکله تاوتریخوالي لامل شوی دی.