د شیورون پخوانی اجرائیوي رئیس د وینزویلا د تیلو پروژو لپاره دوه میلیارد ډالر غواړي.
د مادورو له نیول کېدو څو ساعته وروسته، ټرمپ وویل چې د امریکا د تېلو شرکتونه چمتو دي میلیاردونه ډالر پانګونه وکړي ترڅو د وینزویلا د خامو تېلو تولید زیات کړي او بیې یې راټیټې کړي.
د فایننشل ټایمز د راپور له مخې، د شېورون پخوانی لوړپوړی اجرائیوي رئیس علي مشیري د وینزویلا د تېلو د پروژو لپاره ۲ میلیارده ډالر راټولوي، وروسته له هغه چې امریکا د دغه هېواد مشر نیکولاس مادورو ونیوه او ولسمشر ډونالډ ټرمپ وویل چې واشنګټن به د تېلو تولیدوونکي هېواد کنټرول په لاس کې واخلي.
د مشیري د پانګونې صندوق، اموس ګلوبل انرجي منجمنټ، د وینزویلا ګڼې شتمنۍ پېژندلې دي او د پانګونې د پیل لپاره یې له بنسټیزو پانګه والو سره د خصوصي پانګونې په اړه خبرې کوي.
مشیري فایننشل ټایمز ته وویل: «په تېرو ۲۴ ساعتونو کې مې له احتمالي پانګوالو څخه لسګونه زنګونه ترلاسه کړي دي. په وینزویلا کې د پانګونې لېوالتیا له صفره ۹۹ سلنې ته لوړه شوې ده.»
د وینزویلا د مشر له نیول کېدو یوازې څو ساعته وروسته، ټرمپ وویل چې امریکايي د تېلو شرکتونه چمتو دي میلیاردونه ډالر ولګوي ترڅو د وینزویلا د خامو تېلو تولید بېرته ورغوي، هغه څه چې کولی شي د نړیوال اقتصاد وده پیاوړې کړي، ځکه چې د عرضې زیاتوالی د انرژۍ بیې راکموي.
اموس ګلوبل انرجي تر اوسه د رویټرز د تبصرې غوښتنې ته ځواب نه دی ورکړی.
شنونکي خبرداری ورکوي چې د تولید بېرته راګرځول به د زړې او زیانمنې زېربنا د بیا رغولو لپاره پراخې پانګونې ته اړتیا ولري، او د نړیوالو تېلو د اضافي عرضې له امله ښايي د بازار اغېز محدوده وي، چې دا د امریکا د شرکتونو لېوالتیا تر پوښتنې لاندې راولي.
