د پاکستان د اطلاعاتو وزارت د حقایقو د پلټنې مرکز په یوه اعلامیه کې د افغانستان د دفاع وزارت هغه ادعاوې "دروغ" وبللې چې ګواکې په خیبر پښتونخوا او بلوچستان ایالتونو کې یې د بې پیلوټه الوتکو په واسطه د داعش خراسان څانګې مرکزونه ویشتلي دي.
وزارت ویلي: «دا ادعاوې د تل په څېر دروغ دي.» دغه وزارت په مقابل کې تور پورې کړ چې د داعش په ګډون د ۲۴ نورو وسله والو ډلو ترهګریز مرکزونه په حقیقت کې «د افغان طالبانو د رژیم تر کنټرول لاندې سیمو کې موقعیت لري، له هغه ځایه اداره کیږي او پالل کیږي.»
دغه وزارت کابل تورن کړ چې د دا ډول بیانونو په خپرولو سره غواړي په ګاونډیو هیوادونو او سیمه کې د "ترهګرۍ څخه خپل ملاتړ" پټ کړي.
تر دې وړاندې، د افغانستان دفاع وزارت ادعا کړې وه چې هغه ځایونه یې ویشتلي چې د "مغرضو استخباراتي کړیو" په ملاتړ د افغانستان په خلاف د بریدونو لپاره کارول کېدل.
خو د پاکستان د اطلاعاتو وزارت وویل چې د طالبانو د رژیم اړوند یوه "ساده بې پیلوټه الوتکه" د خیبر ولسوالۍ "شینکو" سیمې ته داخله شوې وه چې «سمدستي وپېژندل شوه او له منځه یوړل شوه.»
د کابل او اسلام اباد ترمنځ اړیکې په وروستیو میاشتو کې د سرحدي امنیت او یو بل پر خاوره د وسله والو ډلو د بریدونو د تورونو له امله سختې ترینګلې شوې دي.
د افغانستان دفاع وزارت بیا ټینګار کړی: «افغانستان به نور د خپل امنیت او ثبات په وړاندې هیڅ ګواښ ونه زغمي.»
