د لا ډېر کړکېچ د مخنیوي لپاره امریکا او ایران څو وړاندیزونه تبادله کړي دي
راپورونه وايي ټرمپ پر ایران د بریدونو د ځنډولو له اعلان څخه ۲۴ ساعته مخکې د سعودي عربستان، قطر او متحده عربي اماراتو له مشرانو سره ټیلیفوني خبرې کړې وې.
واشنګټن پوسټ ورځپاڼې د دوشنبې په ورځ د چارواکو په حواله راپور ورکړ چې د لا زیاتې شخړې د مخنیوي په موخه، امریکا متحده ایالاتو او ایران تېره اونۍ څو وړاندیزونه او ځوابي وړاندیزونه تبادله کړي دي.
په راپور کې ویل شوي چې د امریکا ولسمشر ډونالډ ټرمپ د اټومي بډاینې د محدودیتونو په اړه د ایران له پخواني وړاندیز څخه راضي نه و او د داسې یوې هوکړې په لټه کې دی چې لا ډېر محدودیتونه ولري.
د مذاکراتو په تېرو پړاوونو کې، متحده ایالاتو وړاندیز کړی و چې ایران باید د ۲۵ کلونو لپاره د یورانیمو له بډاینې څخه منع شي. راپور زیاتوي چې ایران دا وړاندیز رد کړی و، او وروسته امریکا د ۲۰ کلن بندیز وړاندیز وکړ چې هغه هم د تهران له خوا ونه منل شو.
د راپور له مخې، په وروستیو بحثونو کې متحده ایالاتو اشاره کړې چې که تهران په سیمه کې د خپلو نیابتي ډلو له ملاتړ څخه لاس واخلي، ښايي واشنګټن د ایران د تېلو پر صادراتو لګول شوي بندیزونه نرم کړي.
همدارنګه ویل شوي چې وروستي وړاندیزونه ښيي چې ایران ښايي د خپل بډایه شوي یورانیمو د زېرمو د یوې برخې بهر ته لېږدولو ته چمتو وي. خو راپور زیاتوي چې دا هیڅ یوه موضوع لا وروستۍ شوې نه ده او دواړه لوري ښايي دا په یوې پراخې هوکړې پورې وتړي.
اړونده مخینه
ټرمپ د دوشنبې په ورځ وویل، ده پر ایران د بریدونو د بیا پیلولو د ځنډولو پرېکړه وروسته له هغه وکړه چې د سیمې څو هېوادونو ورته وویل چې دوی باور لري د جګړې د بشپړ پای ته رسولو لپاره هوکړه نږدې ده. هغه وویل چې د سعودي عربستان، قطر، متحده عربي اماراتو او ځینو نورو هېوادونو مشرانو ترې غوښتي و چې بریدونه وځنډوي ځکه "دوی فکر کوي چې یوې هوکړې ته خورا نږدې شوي دي."
د "اکسیوس" خبري ویبپاڼې د راپور له مخې، ټرمپ خپل اعلان ته تر ۲۴ ساعته لږ وخت کې د سعودي، قطر او اماراتو له مشرانو سره ټیلیفوني خبرې کړې وې. عرب مشرانو ټرمپ ته ویلي چې دوی نه غواړي د ایران د احتمالي ځوابي برید له امله د دوی د تېلو او انرژۍ تاسیساتو ته زیان ورسېږي.
په سیمه کې کړکېچ وروسته له هغه زیات شو چې متحده ایالاتو او اسرائیلو د فبرورۍ پر ۲۸مه پر ایران بریدونه پیل کړل، چې ورسره سم تهران هم ځوابي بریدونه وکړل او د هرمز په تنګي کې یې خنډونه جوړ کړل.
د اپریل پر ۸مه د پاکستان په منځګړیتوب یو اوربند وشو، خو په اسلام اباد کې خبرې د یوې تلپاتې هوکړې په ترلاسه کولو کې پاتې راغلې. اوربند وروسته د ټرمپ له خوا د نامعلومې مودې لپاره وغځول شو، خو د اپریل له ۱۳مې راهیسې متحده ایالاتو په دغه ستراتیژیکه لاره کې د ایران پر سمندري تګ راتګ کلابندي لګولې ده.
