په فرانسه کې د کال له پیل راهیسې ۱۱۶ زره هکتاره ځمکه ایرې شوې ده.
د فرانسې ولسمشر ایمانویل مکرون له تورکیې څخه مننه وکړه چې د دغه هېواد د هغو پراخو اورونو د مړ کولو لپاره یې د اور وژنې الوتکې لېږلې دي چې له اونیو راهیسې دوام لري.

مکرون پر خپله ایکس (X) پاڼه د تورکیې د کرنې او ځنګلونو د وزیر ابراهیم یوماکلي هغه پوسټ شریک کړ چې فرانسې ته د اور وژنې الوتکو د لېږلو په اړه و.

مکرون په خپل پیغام کې، چې په ترکي ژبه یې لیکلی و او د تورکیې بیرغ هم ورسره و، د "مننه تورکیې" (Teşekkürler Türkiye) جمله کارولې ده.

د تورکیې د کرنې او ځنګلونو وزیر ابراهیم یوماکلي په خپل پوسټ کې ویلي وو چې د ولسمشر رجب طیب اردوغان په لارښوونه یې له اسپانیا وروسته فرانسې ته هم د هغوی د غوښتنې پر اساس دوه د اور وژنې الوتکې لېږلې دي.

فرانسې چې د خپل تاریخ یو له تر ټولو لویو اور لګېدنو سره مخ ده، د روان کال له پیل راهیسې پکې ۱۱۶ زره هکتاره ځمکه سوځېدلې ده.

د هېواد په سویل کې په "جیرونډ" (Gironde) ولایت کې د نږدې یوې اونۍ راهیسې په روان اور کې له ۴۲ زره هکتارو څخه ډېره ځمکه لمبو نیولې ده، او په جیرونډ، وار (Var)، لانډس (Landes) او اوټ-کورس (Haute-Corse) ولایتونو کې اورونه لا هم نه دي کنټرول شوي.