د فلسطیني چارواکو په وینا، غیرقانوني اسرائیلي میشتو کډوالو رام الله ته څېرمه د "دیر جریر" پر کلي د برید پر مهال ډزې کړې دي.
د فلسطیني چارواکو په وینا، د یکشنبې په ورځ ناوخته د اشغال شوې لویدیځې غاړې رام الله ته څېرمه د "دیر جریر" پر کلي د غیرقانوني اسرائیلي میشتو کډوالو په برید کې دوه فلسطینیان وژل شوي او یو بل ټپي شوی دی.
د فلسطین د روغتیا وزارت وژل شوي کسان ۵۳ کلن عوده عبدالرحیم عوده فرخنه او ۲۶ کلن احمد عادل رشید ابو مخ په نومونو پېژندلي او ویلي یې دي چې دوی د اسرائیلیانو په ډزو وژل شوي دي.
تر دې وړاندې، د فلسطین سرې میاشتې ټولنې ویلي وو چې د دوی کارکوونکو یو تن چې په نس کې یې د مرمۍ لګېدو له امله حالت نازک و، روغتون ته انتقال کړی او د لېږد پر مهال یې ورته د ژغورنې لومړنۍ طبي مرستې هم ورکړې وې.
دغې ټولنې وروسته وویل چې یو بل کس هم چې پر زنګون په مرمۍ لګېدلی و، روغتون ته وړل شوی؛ او وروسته یې اعلان وکړ چې کارکوونکو یې د یوه بل ۵۵ کلن قرباني د انتقال پر مهال هم د هغه د زړه د بیا فعالولوهڅه کوله.
پر فلسطینیانو د اسرائیلي بریدونو زیاتوالی
د فلسطین رسمي خبري اژانس "وفا" ویلي چې د رام الله او البیره ولایتونو په بېلابېلو ښارګوټو او کلو کې د فلسطینیانو او د هغوی پر ملکیتونو د غیرقانوني اسرائیلي میشته کونکو په بریدونو کې زیاتوالی راغلی دی. په دغو بریدونو کې فزیکي ځورونه، ډزې، د اور اچونې پېښې او د اسرائیلي پوځ تر ملاتړ لاندې پر کرنیزو ځمکو بریدونه شامل دي.
د فلسطیني رسمي شمېرو له مخې، اسرائیلي پوځ او غیرقانوني میشته کونکو د ۲۰۲۳ کال د اکتوبر په میاشت کې په غزه کې د نسل وژنې له پیل راهیسې په اشغال شوې لویدیځې غاړه کې خپلو بریدونو ته زور ورکړی، چې په پایله کې یې لږ تر لږه ۱۱۸۱ فلسطینیان وژل شوي، ۱۳۰۰۰ ټپیان شوي او نږدې ۲۴۰۰۰ نور نیول شوي دي.
